Azərbaycan müstəmləkəçiliyin və istismarın bütün formalarına qarşıdır — DEPUTAT
XXI əsrdə dünya yeni texnologiyalara, beynəlxalq əməkdaşlıqlara və bəşəri dəyərlərə doğru irəlilədikcə, bəzi xalqlar hələ də müstəmləkə altında yaşayır. Belə xalqlardan biri də Qvadelup xalqıdır. Karib dənizinin şərqində yerləşən Qvadelup — faktiki olaraq bir xalqın siyasi iradəsinin boğulduğu və öz gələcəyini müəyyənləşdirmək hüququndan məhrum olduğu bir coğrafiyadır. Bakıda keçirilmiş “Qvadelupun Dekolonizasiyasına Doğru! Çağırışlar və Perspektivlər” adlı beynəlxalq konfrans, məhz bu susdurulmuş səsin eşidilməsi və tarixi ədalətsizliyin beynəlxalq diqqətə çatdırılması baxımından mühüm addımdır. Azərbaycanın təşəbbüsü və ev sahibliyi ilə baş tutan bu tədbir neokolonializmin yeni təzahürlərinə qarşı beynəlxalq həmrəyliyin çağırışıdır.
Mövzu ilə bağlı Crossmedia.az-a açıqlama verən Milli Məclisin deputatı Vüqar Rəhimzadə ilk olaraq bildirib ki, Dekolonizasiya dialoqlarının mərkəzinə çevrilmiş Bakıda Fransanın müstəmləkəçilik siyasətinin əsarətində olan Qvadelup adasına həsr olunmuş “Qvadelupun dekolonizasiyasına doğru! Çağırışlar və perspektivlər” adlı beynəlxalq tematik konfrans keçirilib:
“Konfrans Bakı Təşəbbüs Qrupu, Qvadelupun Azadlığı Uğrunda Xalq Birliyi, Qvadelup Beynəlxalq Təzminatlar Hərəkatı, Qaradərili Xalqların Beynəlxalq Komitəsi və Qvadelup Millətinin Yaranması naminə Güc Hərəkatının birgə təşkilatçılığı ilə baş tutub. Qvadelup hələ də Fransanın tabeliyində dənizaşırı departament statusunda saxlanılır və bu status, Qvadelup xalqının öz siyasi gələcəyini azad iradəsinə uyğun olaraq tam şəkildə sərbəst müəyyənləşdirmək hüququnun həyata keçirilməsinə mane olur.
Azərbaycan XXI əsrdə kolonializmin davam etməsindən və kolonializmin yeni təzahürləri meyllərinin artmasından olduqca narahatdır. Bəşəriyyətin kolonializm tarixinin qanlı cinayətlərinin çoxu məhz Fransa tərəfindən törədilib. Afrika, Cənub-Şərqi Asiya, Sakit Okean və Latın Amerikasında onlarla ölkəni işğal edən, sərvətlərini talan edən, xalqlarını uzun illər əsarətdə saxlayan Fransa həmin ərazilərdə hərbi və bəşəriyyət əleyhinə çoxsaylı cinayətlər törədib; fransız silahlı qüvvələri etnik və dini mənsubiyyətinə görə yüz minlərlə dinc sakini soyqırıma məruz qoyub”.
Deputat bildirib ki, neokolonializm meyillərinin artmasından narahatlığını Bakı Təşəbbüs Qrupunu yaratmaqla bildirən Azərbaycanın qısa müddətdə gördüyü işlər beynəlxalq səviyyədə dəstəklənir:
“Fransanın bu mənfur siyasətinə son qoyması üçün digər dövlətlərin də Azərbaycanın ədalətli mövqeyini dəstəkləməsinə böyük zərurət var. Son illərdə neokolonializmə qarşı mübarizə bütün Afrika ölkələrini bürüyüb. Azərbaycan dövləti daim beynəlxalq müstəvidə atdığı hər bir addımla sübut edib ki, o, müstəmləkəçiliyin, siyasi, iqtisadi, mənəvi istismarın hər cür təzahürünə qarşıdır və bunu yolverilməz hesab edir. Bakıda keçirilən konfransın yekun bəyanatında qeyd edildiyi kimi, Bakı Təşəbbüs Qrupu kimi beynəlxalq platformalar əzilən xalqların səsini dünya ictimaiyyətinə çatdırmaq və qlobal dekolonizasiya gündəminin beynəlxalq platformalara daşınmasında vacib rol oynayır. Qvadelup xalqının suverenliyə sülh yolu ilə, ədalətli və demokratik əsaslarla keçid prosesi təmin edilməlidir. Qvadelupun gələcəyi yalnız onun xalqına məxsusdur”.
Nəzrin Salmanova
19:25 25.06.2025
Oxunuş sayı: 16045
