Mütəxəssislərdən xəbərdarlıq!: Çox oturmaq beynin fəaliyyətinə ziyandır
ABŞ-də aparılan yeni bir elmi araşdırmaya görə, uzun müddət oturaq həyat tərzi yalnız fiziki sağlamlığa deyil, həm də beyin quruluşuna mənfi təsir göstərir.
Vanderbilt Universiteti, Pittsburgh Universiteti və Seul Milli Universitetinin alimlərinin apardığı araşdırmada 50 yaşdan yuxarı şəxslərin gündəlik oturma müddəti ilə beyin sağlamlığı arasındakı əlaqə öyrənilib. Tədqiqat göstərib ki, hərəkətsiz həyat tərzi Alzheimer və digər demensiya növləri ilə əlaqələndirilə bilər.
Crossmedia.az bildirir ki, bu barədə “Haber Global” məlumat yayıb.
Belə ki, araşdırma çərçivəsində 404 könüllü bir həftə ərzində xüsusi sensorlarla izlənilib. Onların 87 faizi həftəlik tövsiyə olunan minimum 150 dəqiqəlik fiziki aktivliyi yerinə yetirsə də, gündə daha çox oturan şəxslərdə beyin həcminin azaldığı və bilişsel zəifləmə əlamətləri müşahidə olunub. Xüsusilə yaddaşla əlaqəli olan hipokampus bölgəsində incəlmə qeydə alınıb. Qeyd edək ki, bu bölgə Alzheimer xəstəliyinin ilk təsir etdiyi sahələrdən biridir.
Neyroloq Dr. Marissa Gogniat qeyd edib: “Alzheimer riskini azaltmaq təkcə idmanla mümkün deyil. Gün ərzində oturma müddətini azaltmaq da vacibdir”.
Alimlər oturmaqla beyin sağlamlığı arasında birbaşa səbəb-nəticə əlaqəsi qurulmasa da, hərəkətsizliyin artması ilə yaşlanma prosesinin beyində daha sürətli irəlilədiyini bildiriblər. Genetik olaraq Alzheimer xəstəliyinə meyilli şəxslərdə isə bu təsirin daha güclü olduğu aşkar edilib.
Vanderbilt Universiteti Tibb Mərkəzindən Dr. Angela Cefferson da vurğulayıb: “Xüsusilə genetik risk daşıyan şəxslər gün ərzində tez-tez fasilələr verərək oturma müddətini azaltmalıdırlar. Bu, beyin sağlamlığı üçün olduqca vacibdir”.
Bildirilir ki, mütəxəssislər masa arxasında uzun müddət işləyən və oturaq həyat tərzi keçirən insanlara aktivliklərini artırmağı və oturma müddətlərini azaltmağı tövsiyə edirlər.
Fatimə Məmmədova
23:25 24.05.2025
Oxunuş sayı: 790
