“Teatr pedaqogikası: istedad, yoxsa elm?” – Nəsildən-nəslə uzanan sənət söhbəti
Azərbaycan teatrının təkcə səhnəsi deyil, həm də söhbəti, sualları, axtarışları var. Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin (MEMİM) təşəbbüsü ilə gerçəkləşən “Nəsildən-nəslə teatr” layihəsi də bu sualları cavablandırmaq, teatrın ruhunu nəsillər arasında ötürmək üçün bir körpüyə çevrilib.
Crossmedia.az xəbər verir ki, 29 aprel tarixində Azərbaycan Dövlət Akademik Milli Dram Teatrının kiçik səhnəsində layihə çərçivəsində növbəti seminar baş tutdu. “Teatr pedaqogikası: istedad yoxsa elm?..” adlı panel müzakirəsi teatrsevərləri, gənc sənət axtarışçılarını və təcrübəli sənətkarları bir araya gətirdi.
Panelin xüsusi qonağı, Azərbaycan Respublikasının Əməkdar artisti, rejissor və aktyor Nicat Kazımov idi. Onunla keçirilən bu interaktiv görüşdə yalnız teatrın səhnəsi deyil, onun məktəbi, metodu, fəlsəfəsi müzakirə olundu. Kazımov teatr pedaqogikasının nəzəri və praktiki əsaslarından danışaraq, müasir dövrdə teatr təhsilinin hansı istiqamətə dəyişdiyini, ənənə və yenilik arasında hansı balansın qorunduğunu işıqlandırdı.
Tədbirin moderatoru – teatrşünas Dağlar Yusifin idarəçiliyi ilə seminar dialoqa, müzakirəyə və təcrübə paylaşımına çevrildi. Seminarın sonunda auditoriyanın verdiyi suallar göstərdi ki, bu cür platformalar təkcə öyrədir, yox, həm də düşündürür.
MEMİM-in direktor əvəzi Vüqar Hümbətov tədbiri açaraq layihənin əsas məqsədinin gənclərlə peşəkarlar arasında bir fikir və sənət körpüsü yaratmaq, Azərbaycanda teatr prosesinin inkişafına yeni nəfəs qatmaq olduğunu bildirdi.
“Nəsildən-nəslə teatr” – bu yalnız layihənin adı deyil, həm də Azərbaycan səhnəsinin gələcəyini quracaq ruhun ifadəsidir. Bu ruh isə məhz belə görüşlərdə, dialoqlarda yaşayır.
Ayan Sədi
19:15 30.04.2025
Oxunuş sayı: 5186
