Azərbaycan- Özbəkistan hərbi əlaqələri regionda sülh və təhlükəsizliyə hesablanır - Ekspert
Azərbaycanla Özbəkistan arasında strateji tərəfdaşlıq münasibətləri təkcə siyasi və iqtisadi sahələrlə məhdudlaşmır, həm də hərbi əməkdaşlıq istiqamətində ardıcıl şəkildə inkişaf edir. Bu əlaqələrin növbəti təzahürü kimi, Azərbaycan Respublikasının müdafiə naziri, general-polkovnik Zakir Həsənov oktyabrın 20-də Özbəkistan müdafiə naziri general-leytenant Şuhrat Xalmuxamedovun dəvəti ilə Səmərqənd şəhərinə səfər edib.
Nazir Zakir Həsənovun “Birlik-2025” birgə təliminin “Yüksək Səviyyəli Müşahidəçi Günü” çərçivəsində iştirak məqsədilə həyata keçirilən bu səfəri iki qardaş ölkə arasında hərbi, hərbi-texniki və hərbi təhsil sahələrində əməkdaşlığın güclənməsi baxımından mühüm əhəmiyyət daşıyır. Görüş zamanı tərəflər mövcud əlaqələrin inkişaf perspektivlərini müzakirə edib, birgə təlimlərin keçirilməsinin və təcrübə mübadiləsinin vacibliyini xüsusi vurğulayıblar.
Səmərqənddə keçirilən görüşdə, həmçinin Azərbaycanın Özbəkistandakı fövqəladə və səlahiyyətli səfiri Hüseyn Quliyev də iştirak edib. Tərəflər iki ölkə arasında mövcud hərbi əməkdaşlığın yüksək səviyyədə olduğunu qeyd edərək, gələcəkdə bu münasibətlərin daha da dərinləşdirilməsi istiqamətində qarşılıqlı niyyətlərini ifadə ediblər.
Məsələ ilə bağlı hərbi ekspert Ədalət Verdiyev Crossmedia.az-la öz fikirlərini bölüşüb: "Azərbaycanla Özbəkistan arasında strateji əməkdaşlıq bütün sahələrdə, o cümlədən hərbi sahədə də uğurla inkişaf edir. İki ölkə həm ikitərəfli formatda, həm də Türk Dövlətləri Təşkilatı çərçivəsində əməkdaşlığı artan dinamika ilə genişləndirirlər. 2022-ci ildə Azərbaycanla Özbəkistan arasında hərbi-texniki əməkdaşlıq haqqında saziş imzalanıb. Bundan əlavə, Azərbaycan Milli Müdafiə Universitetinin rektorunun müavini, general-mayor Arif Həsənovun iştirakı ilə Özbəkistanın müvafiq qurumlarının nümayəndələri arasında bir sıra məsələlər, o cümlədən birgə layihələrin həyata keçirilməsi istiqamətində geniş müzakirələr aparılıb.
Hər iki ölkənin müdafiə nazirləri “Birlik-2025” təlimlərində iştirak ediblər. Təlimlər çərçivəsində tərəflər arasında hərbi-texniki və hərbi təhsil sahələrində əməkdaşlıq məsələləri də ətraflı müzakirə olunub. Azərbaycanlı hərbi qulluqçuların Özbəkistanda, Özbəkistan hərbi qulluqçularının isə Azərbaycanda müxtəlif hərbi kurslarda iştirakı da əməkdaşlığın mühüm istiqamətlərindən biridir".
Ekspert, həmçinin rəsmi Bakı və Daşkənd arasında hərbi əməkdaşlığın genişlənməsi regionda sülhün və təhlükəsizliyin təmin olunması baxımından xüsusi əhəmiyyət kəsb etdiyini qeyd edib:
"İki dost və müttəfiq ölkə arasındakı münasibətlərin daha da dərinləşdirilməsi hər iki dövlətin strateji maraqlarına tam cavab verir" - deyə o əlavə edib.
Elmir Heydərli
21:00 21.10.2025
Oxunuş sayı: 5950
