Turan Tekstil Sərgisi: Zəhmətin və sənətin birliyi
Bu gün Bakıda bölgədə iqtisadi əməkdaşlığın gücləndirilməsi və tekstil sənayesinin inkişafı baxımından mühüm əhəmiyyətə malik olan Turan Tekstil Sərgisinin təntənəli açılış mərasimi keçirildi. Sərgi yalnız geyim və dizayn dünyasının nümayəndələrini deyil, eyni zamanda regional iqtisadi dialoqa töhfə vermək istəyən sahibkarları, sənətkarları və iş adamlarını bir araya topladı.
Mərasimdə dövlət qurumlarının rəsmiləri, türk dövlətlərindən gəlmiş nümayəndələr, yerli sahibkarlar və media təmsilçiləri iştirak edirdilər. Tədbir, təkcə kommersiya xarakteri daşımır, həm də Türk dünyası üçün strateji əməkdaşlıq platforması hesab olunur.
Azərbaycan Françayzinq Assosiasiyasının (AFA) sədri Camid Mövsümov çıxışında qeyd etdi ki, bu sərgi yalnız tekstil sənayesinin inkişafına deyil, həm də türk dövlətləri arasında iqtisadi və mədəni körpülərin qurulmasına xidmət edir. Onun sözlərinə görə, bu cür tədbirlər yeni əməkdaşlıq imkanlarının yaradılması, ortaq layihələrin gerçəkləşməsi və regional bazarlara çıxış baxımından mühüm rol oynayır.
Sərgidə Türkiyə, Türkmənistan, Özbəkistan kimi qardaş ölkələrdən gəlmiş 100-ə yaxın marka və şirkət iştirak edirdi. Tanınmış tekstil istehsalçıları, dizaynerlər və sənaye nümayəndələri məhsullarını və texnologiyalarını təqdim etməklə yanaşı, gələcək tərəfdaşlıq üçün də fəal danışıqlar aparırdılar. Bu, bölgənin iqtisadi inteqrasiyası baxımından əlamətdar bir hadisə idi.
Həmçinin sərgidə gördüklərimiz bizi təkcə sevindirmədi, eyni zamanda qürurlandırdı. Sənətin müxtəlif sahələrinin bir məkanda cəmlənməsi, yaradıcı insanların zəhmətini görmək və bu zəhmətə olan ictimai münasibəti müşahidə etmək mənəvi baxımdan çox dəyərli idi.Sərgi salonuna daxil olan kimi bizi qarşılayan mənzərə sözün əsl mənasında heyranedici idi. Göz oxşayan rəsm əsərləri divarlarda öz yerini almış, zərif toxunuşlarla hazırlanmış əl işləri isə zövqlə müxtəlif guşələrə yerləşdirilmişdi. Bu sənət nümunələri təkcə estetik deyil, həm də emosional və mədəni dərinliyi ilə seçilirdi.
Sərgi boyunca ziyarətçi axını dayanmadan davam edirdi. Hər kəs maraqla guşələri gəzir, sənət əsərlərinə yaxınlaşıb onları hiss etməyə çalışırdı. Ziyarətçilərin arasında fərqli yaş qruplarından insanlar vardı – sənətə maraq göstərən tələbələrdən tutmuş iş dünyasının təcrübəli nümayəndələrinə qədər.
Ən təsirli anlardan biri isə sərgidə şahidi olduğumuz səmimi bir səhnə idi. Balaca bir oğlan uşağı rəngbərəng broş və aksesuarların sərgiləndiyi stendin qarşısında dayanmışdı. Gözləri sevinc və maraqla parlayır, heyranlıqla bir broşa baxırdı. “Ana, bax, bu çox gözəldir. Alaq, olar?” – deyə həyəcanla soruşdu. Anası əvvəlcə gülümsədi, sonra isə övladının sevincinə biganə qalmayaraq həmin broşu aldı. Bu sadə, amma duyğulu alış-veriş anı bir daha sübut etdi ki, sənət yalnız baxmaq üçün deyil, hiss etmək, yaşamaq və paylaşmaq üçündür.
Sərgidə diqqət çəkən əsas nüanslardan biri də əl işlərinə verilən yüksək dəyər idi. İpəkdən hazırlanmış geyimlər, naxışlı çantalar, əl toxumaları və müxtəlif aksessuarlar burada sadəcə bir məhsul kimi deyil, bütöv bir mədəniyyətin daşıyıcısı kimi təqdim olunurdu.
Sənətkarlarla etdiyimiz qısa söhbətlərdə onların işlərinə duyduqları sevgi və ehtiras dərhal hiss olunurdu. Çoxları üçün bu sənət sadəcə bir gəlir mənbəyi deyil, bir həyat fəlsəfəsi, bəziləri üçün isə bir ömürlük eşq idi.
Turan Tekstil Sərgisi bir daha göstərdi ki, sənət sükutla danışır – səsi olmadan bizə bir xalqın düşüncəsini, zövqünü və ruhunu anlatmağı bacarır.
Həmin gün içimizdə yaranan duyğu isə sadəcə heyranlıq deyildi – bu, sənətə, zəhmətə və onu yaşadan insanlara olan dərin və səmimi bir hörmət idi.
Bu sərgi bizə bir daha sübut etdi ki, sənət və iqtisadiyyat arasında görünməyən, lakin çox güclü bir bağ var. Bu bağ yalnız rəqəmlərlə ölçülmür – onun çəkisi duyğular, zəhmət və yaratma həvəsi ilə ölçülür. Belə təşəbbüslərin davamlı olması, yaradıcı insanların daha geniş auditoriyaya çıxışı və Türk dünyasında ortaq mədəni dəyərlərin qorunub yaşadılması baxımından son dərəcə önəmlidir.
Fidan Xəlilova
Aydan Quliyeva
14:36 30.04.2025
Oxunuş sayı: 1096
