Ekspertdən xəbərdarlıq: Rusiya iqtisadiyyatı ciddi zərbə görəcək
Rusiya-Ukrayna müharibəsinin hər iki cəbhəni ciddi böhranlara sürüklədiyi açıq aydın görünür. Burada iqtisadi baxımdan hər iki ölkə ciddi problemlərlə üz-üzə qalsa da, Ukraynanın daha ağır vəziyyətdə olduğunu görə bilərik. Bu iqtisadi ziyanlar çoxşaxəlidir və qısa müddətli itkilərdən əlavə uzunmüddətli strukturlar problemlərə yol açır. Hər iki ölkənin iqtisadiyyatı bu ziyanları yox etmək və güclü inkişaf üçün yeni strategiyalar həmçinin beynəlxalq dəstək tələb edir. Bu vəziyyət regionla yanaşı, qlobal iqtisadi sabitliyə mənfi təsir göstərir.
İqtisadçı- ekspert Natiq Cəfərli davam edən savaşın hər iki ölkəyə iqtisadi təsirləri barədə fikirlərini Crossmedia.az-la bölüşüb. O, bildirib ki, müharibədə Ukraynada itkilər daha çoxdur: "Torpaq itkiləri, dağıdılmış enerji infrastrukturu habelə zavodlar, fabriklər bu itkilər sırasındadır. Ukraynanın Ümumdaxili məhsulu müharibənin başlanğıcından bu yana 30%-ə qədər azalıb. Rusiyayaya isə 20 minə yaxın sanksiyalar tətbiq olunub. Əlbəttə, Rusiya iqtisadiyyatı da dəyişikliklərə məruz qalıb. Həm infilyasiya yüksək səviyyədədir, həm də bahalaşma var. Hər ötən il bu bahalaşmanın daha çoxuna şahid oluruq".
Ekspert, həmçinin Rusiyanın milli valyutası olan rublun dəyərdən düşdüyünə diqqət çəkib: "Müharibə başlayandan bəri rubl 20 faiz ucuzlaşıb. Nəticə olaraq bu müharibənin hər iki ölkə iqtisadiyyatına vurduğu zərər birdən çoxdur. Savaş bitdikdən sonra Ukraynanın yenidən qurulması daha ağır olacaq. Çünki tərəflər arasında müharibədən ən çox zərərçəkən məhz Ukraynadır. Görünən odur ki, müharibədən sonra Ukraynaya ciddi bir beynəlxalq dəstək olmasa Ukrayna bu problemləri təkbaşına həll edə bilməyəcək. Amma bununla yanaşı dünyada bu məsələyə qarşı konfranslar, tədbirlər keçirilir ki, Ukrayna yenidən dirçələ bilsin. Ümumiyyətlə, problemlər kifayət qədərdir. Ona görə də Rusiya cəbhəsində vəziyyət qeyri-sabit hal alır. Neft-qaz qiymətlərinin düşməsi Rusiyanın büdcəsinə çox ciddi mənfi təsir göstərir. Nəticə etibarilə neft qiymətlərinin düşməsini uzunmüddətli müşahidə edəcəyiksə, bu, Rusiyanın iqtisadiyyatına sanksiyalardan daha çox ziyan vuracaq".
Ləman Həsənova
14:55 10.04.2025
Oxunuş sayı: 11185
