Azərbaycanla Bosniya və Herseqovina arasında əsir və itkin düşmüş şəxslərlə bağlı qarşılıqlı əməkdaşlıq müzakirə edilib
Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyasının nümayəndə heyəti Bosniya və Herseqovinanın İtkin Şəxslər İnstitutunda olub. Komissiyanın katibi Qəzənfər Əhmədov, nümayəndə heyətinin üzvləri Zaur İsmayılov və Nicat Bədəlzadə Bosniya və Herseqovina tərəfinin dəvəti ilə bu ölkəyə səfər çərçivəsində institutun Direktorlar Kollegiyasının üzvləri ilə görüş keçiriblər. Görüşdə kollegiyanın sədri Nikola Perişiç, kollegiya üzvləri Marko Yurişiç və Saliha Cuderiya, ölkəmizin Bosniya və Herseqovinadakı səfiri Vilayət Quliyev və səfirliyin birinci katibi Emil Ağayev iştirak ediblər.
Görüşün məqsədi qarşılıqlı əməkdaşlığı müzakirə etmək, itkin düşmüş şəxslərin axtarışı, ekshumasiya, identifikasiya və məlumat bazalarının idarə edilməsi sahəsində təcrübə mübadiləsinə diqqət yetirmək olub.
Qəzənfər Əhmədov Bosniya və Herseqovinanın münaqişədən sonra itkin şəxslərlə bağlı məsələlərdəki təcrübəsinin əhəmiyyətini vurğulayıb: “Bosniya və Herseqovinanın müharibədən sonra itkin şəxslərin axtarışı sahəsindəki təcrübəsi son dərəcə dəyərlidir. Sizin ölkənizdə qazanılan təcrübədən çox şey öyrənə bilərik. Bu isə axtarışları indi də davam edən minlərlə itkin şəxsin yerini müəyyənləşdirməyə kömək edə bilər”.
Nikola Perişiç isə Bosniya və Herseqovinanın təcrübə mübadiləsi və itkin şəxslərin axtarılıb tapılması üçün bütün maraqlı tərəflərlə əməkdaşlığa sadiqliyini qeyd edib: “Ölkəmizdə 1990-cı illərdəki hərbi münaqişə zamanı itkin düşmüş şəxslərin üçdə ikisi tapılıb. Lakin yüzlərlə insanın taleyi hələ də məlum deyil. Ona görə də biz işlərimizi dayandırmırıq - axtarışa davam edirik. Yardım göstərə biləcəyimiz, eləcə də təcrübəsini öyrənə biləcəyimiz hər kəslə işləyirik”.
Hər iki qurum itkin şəxslərin yerini müəyyənləşdirmək, ailələrini onların taleyi barədə məlumatlandırmaq, qurbanların ləyaqətini bərpa etmək, ədalətə və həqiqətə töhfə vermək üçün ümumi məsuliyyəti bir daha təsdiqləyib. Qarşılıqlı əməkdaşlığın itkin düşmüş şəxslərin taleyini aydınlaşdırmaq və onların ailələrini dəstəkləmək üçün daha səmərəli mexanizmlər yaratmağa kömək edəcəyi vurğulanıb. (Azərtac)
06:28 10.04.2025
Oxunuş sayı: 1816
