Azərbaycan - İran əlaqələrində yeni mərhələ: "Yeni geosiyasi reallıqlar var"
Azərbaycan Prezidenti İlham Əliyev aprelin 8-də İranın yol və şəhərsalma naziri, Azərbaycan-İran İqtisadi Əməkdaşlıq üzrə Hökumətlərarası Birgə Komissiyasının həmsədri Fərzanə Sadiqi qəbul edib.
Prezident İlham Əliyev son dövrlərdə Azərbaycanın və İranın yüksəksəviyyəli nümayəndə heyətlərinin qarşılıqlı səfərlərinin intensiv xarakter daşımasını məmnunluqla qeyd edərək, bunun iki ölkə arasında dostluğun möhkəmləndirilməsinə və ikitərəfli əməkdaşlığın daha da inkişaf etdirilməsinə yaxşı imkan yaratdığını dedi.
Dövlət başçısı Fərzanə Sadiqin ölkəmizə səfəri çərçivəsində Azərbaycan-İran İqtisadi Əməkdaşlıq üzrə Hökumətlərarası Birgə Komissiyasının iclasının keçirilməsini müsbət qiymətləndirdi və Komissiyanın gündəliyində iqtisadi-ticari, energetika, nəqliyyat və digər sahələrdə əməkdaşlığın inkişaf etdirilməsi üçün vacib layihələrin olduğunu qeyd etdi.
Bu barədə Crossmedia.az-a danışan Milli Məclisin deputatı Sahib Alıyevin sözlərinə görə, Azərbaycanla İran arasında səfərlər Şimal-Cənub dəhlizinə dair ümidləri artırır: "Son zamanlarda Azərbaycanla İran arasında yüksək vəzifəli məmurların səfərlərinin intensivləşməsi ilk növbədə yaranmış yeni geosiyasi reallıqla bağlıdır. Bu geosiyasi reallıqlar fonunda İran prezidenti Məsud Pezeşkianın Azərbaycana rəsmi səfərə gələcəyi gözlənilir. İranın yol və şəhərsalma naziri Sadiqin Azərbaycana bu səfəri də məhz Pezeşkianın gözlənilən səfərinə hazırlıq məqsədi daşıyır. Bundan öncə də İran prezidentinin müşaviri və bizim region üzrə orada ən yaxşı mütəxəssislərdən biri Bakıya gəlmişdi. Hazırda bizim üçün aktual olan məsələ şimal-cənub dəhlizi məsələsidir. Rəşt-Astara yolunun tikintisini İran uzun zamandır ki, özlərinə bəlli olan səbəbdən ləngidir. İkinci məsələ Araz dəhlizi məsələdir. Birincidən fərqli olaraq bu ikinci məsələnin tezliklə həllini tapacağına ümidlər böyükdür. Çünki bu, həm də İranın marağındadır. Şimal-Cənub dəhlizinə gəldikdə isə bu, həm də Rusiya-İran danışıqlarının predmetidir. Baxaq görək, yeni geosiyasi reallıq İranın bu məsələyə yanaşmasında da hər hansı bir müsbət dəyişikliklərə aparıb çıxardacaqmı? Hər halda, İran prezidentinin Azərbaycana rəsmi səfəri bunu göstərəcək".
Nuray Qurbanlı
16:55 08.04.2025
Oxunuş sayı: 16129
