Azərbaycan İranla İsrail arasında vasitəsəçi ola bilər - Elmar Məmmədyarov
Azərbaycan və İsrailin xarici işlər nazirləri Ceyhun Bayramov və Gideon Saar Əbu-Dabidə (BƏƏ) görüş keçiriblər.
İki ölkə arasında siyasi, iqtisadi, ticarət, investisiyalar, humanitar sahələr üzrə əməkdaşlığın inkişaf perspektivləri müzakirə olunub, Azərbaycan Respublikası Hökuməti ilə İsrail Dövləti Hökuməti arasında Birgə Komissiyanın rolu qeyd olunub. Tərəflər, habelə, yüksək texnologiyalar, səhiyyə və təhsil sahələrindəki təcrübə mübadiləsinin gücləndirilməsinin əhəmiyyətini vurğulayıblar.
Ölkəmizin, Yaxın Şərq regionunda sülh və sabitliyin bərqərar edilməsini, o cümlədən İsrail-Fələstin münaqişəsinin beynəlxalq hüquq normaları əsasında sülh yolu ilə həlli prosesini dəstəklədiyi bir daha qeyd olunub.
Qarşı tərəf, həmçinin postmünaqişə dövründə bölgədə mövcud vəziyyət və reallıqlar, işğaldan azad olunmuş ərazilərdə aparılan genişmiqyaslı bərpa və quruculuq işləri, mina təhdidi ilə mübarizə səyləri, habelə Azərbaycan-Ermənistan sülh prosesi barədə ətraflı məlumatlandırılıb.
Görüş zamanı, həmçinin qarşılıqlı maraq doğuran digər məsələlər ətrafında fikir mübadiləsi aparılıb.
İranla İsrail arasında münasibətlərin kəskinləşdiyi bir vaxta təsadüf edən görüş barədə Crossmedia.az-a danışan keçmiş xarici işlər naziri Elmar Məmmədyarov söyləyib ki, İsraillə əlaqələr yalnız dövlət maraqlarının tələbi deyil, həm də Azərbaycan diasporunu bu ölkədəki aktivliyi ilə bağlı əhəmiyyətlidir: “İsraildə çoxsaylı azərbaycanlılar yaşayır və bu, bizim əlaqələrimizi yalnız rəsmi səviyyədə deyil, sosial və mədəni müstəvidə də gücləndirir”.
Sabiq nazir Azərbaycanın gələcəkdə İran və İsrail arasında mümkün vasitəçilik rolu barədə də fikir bildirib. Onun sözlərinə görə, bu cür vasitəçilik əgər tərəflər maraqlı olarsa, nəzərdən keçirilə bilər, lakin real müstəvidə bunun baş verməsi ehtimalı aşağıdır: "Çünki vasitəçilik məsələsində dominant rola malik olan əsas aktorlar ABŞ və ərəb ölkələridir".
Nigar Yahyazadə
16:24 08.04.2025
Oxunuş sayı: 2345
