Azərbaycan Özbəkistanla turizm sahəsində əməkdaşlığı genişləndirmək istəyir
Azərbaycan və Özbəkistan turizm sahəsində əməkdaşlığı genişləndirməyi planlaşdırır.
Crossmedia.az xəbər verir ki, bu barədə Özbəkistan KİV-ləri məlumat yayıb.
Bildirilib ki, aprelin 4-də Səmərqənddə Özbəkistanın Turizm Komitəsinin sədri Umid Şadiyevlə Azərbaycanın Dövlət Turizm Agentliyinin sədr müavini Azadə Hüseynova arasında görüş keçirilib.
Görüşün yekunları üzrə "Milli PR-mərkəzi" Dövlət Unitar Müəssisəsi ilə Azərbaycan Turizm Bürosu arasında anlaşma memorandumu imzalanıb. Sənəd Böyük İpək Yolu boyunca vahid turizm marşrutunun inkişafı və təşviqinə yönəlib.
Əməkdaşlığın əsas məqsədi “Joint Silk Road Highlights Tour” təşəbbüsü çərçivəsində iki ölkənin turizm resurslarının birləşdirilməsidir. Layihə Mərkəzi Avropa ölkələrində turizm marşrutlarının birgə təşviqini, həmçinin Bakı, Şamaxı, Şəki, Xivə, Buxara və Səmərqənd kimi İpək Yolunun əsas tarixi məkanlarına diqqət yetirilməsini nəzərdə tutur.
Memorandum çərçivəsində tərəflər həmçinin birgə B2B tədbirlərinin keçirilməsi, beynəlxalq turizm sərgilərində iştirak və s. barədə razılığa gəliblər.
"İpək Yolunun mərkəzi hissəsində əsas mövqe tutan Azərbaycan və Özbəkistan dünya turizm bazarında rəqabət qabiliyyətini artırmaq üçün tərəfdaşlığı gücləndirir. Sənədin imzalanması sahənin inkişafı və iki ölkə arasında mədəni-iqtisadi əlaqələrin gücləndirilməsi üçün yeni imkanlar açır", - məlumatda qeyd olunub.
11:15 05.04.2025
Oxunuş sayı: 16316
