Amerika ,Yaxın Şərq
ABŞ və İran yeni müharibənin astanasında: Azərbaycan üçün də risklər var
ABŞ-nin aparıcı media qurumu CNN-in Vaşinqtonun İrana qarşı genişmiqyaslı hərbi zərbələrə hazırlaşdığı, artıq esmineslərin, döyüş təyyarələrinin, şəxsi heyətin və "Patriot" hava hücumundan müdafiə sistemlərinin Yaxın Şərqə yerləşdirildiyi barədə yaydığı məlumatlar qlobal gərginliyi pik həddə çatdırıb. ABŞ Prezidenti Donald Trampın hərbi əməliyyat stolundakı variantları masada saxlaması və İsraildə Benyamin Netanyahunun hakimiyyət sükanı arxasında qalması hərbi toqquşma ehtimalını daha da real edir. Vaşinqton Tehranı nüvə proqramından imtina etməyə məcbur etmək üçün siyasi və hərbi təzyiq rıçaqlarını maksimuma qaldırır. Lakin münaqişənin alovlanması təkcə Yaxın Şərqi deyil, birbaşa Azərbaycanın yerləşdiyi regionu da kəskin risklər altına salır.
Politoloq Məhəmməd Əsədullazadə mövcud ehtimallar barədə Crossmedia.az-a danışıb:
"ABŞ Prezidenti Donald Trampın İrana qarşı hərbi əməliyyatlar keçirməsi masadadır. Nəzərə almalıyıq ki, İsraildə aralıq dövrdə də hökumətə Benyamin Netanyahu başçılıq edə bilər. Bu onu göstərir ki, ABŞ-nin İrana qarşı hərbi əməliyyatlar həyata keçirməsi 1 noyabrdan sonra mümkün görünür. Çünki kifayət qədər hərbi esmineslər, təyyarələr və şəxsi heyət Yaxın Şərqə göndərilir, "Patriot" raketləri cəlb olunur. Bu, o deməkdir ki, ABŞ İrana kəskin hərbi və siyasi təzyiqlər edir, rəsmi Tehranı konkret olaraq nüvə proqramından əl çəkməyə sövq etməyə çalışır".
Politoloq rəsmi Tehranın kompromisə getməyəcəyi təqdirdə genişmiqyaslı eskalasiyanın qaçılmaz olacağını diqqətə çatdırıb:
"Əgər İran öz mövqeyindən geri çəkilməsə, ABŞ müharibəyə başlaya bilər. Təbii ki, bu, regionda eskalasiyanı kəskin şəkildə genişləndirəcək".
Məhəmməd Əsədullazadə qonşuluqda alovlanacaq belə bir müharibənin Azərbaycan üçün yaradacağı birbaşa təhlükəsizlik risklərini və Tehran rejiminin aqressiyasını vurğulayaraq fikrini yekunlaşdırıb:
"Azərbaycanın bilavasitə qonşuluğunda müharibənin baş verməsi ölkəmizin təhlükəsizliyi üçün də ciddi təhdid ola bilər. Çünki 44 günlük müharibə dövründə İrandan Azərbaycana yönələn təhdidləri də gördük və növbəti genişmiqyaslı müharibədə İran rejimi daha da aqressiv ola bilər. Hesab edirəm ki, ABŞ müharibəni genişləndirsə, İran öz qonşularını da birbaşa təhdid etməyə başlayacaq".
Zeynəb Həsən
20:30 28.10.2026
Oxunuş sayı: 58
