“Minasız dünya” - vətəndaş cəmiyyəti təşəbbüsləri” mövzusunda tədbir keçirilib
Qeyri-Hökumət Təşkilatlarına Dövlət Dəstəyi Agentliyində Beynəlxalq Mina Xəbərdarlığı və Minatəmizləmə Fəaliyyətinə Yardım Günü ilə bağlı “Minasız dünya” - vətəndaş cəmiyyəti təşəbbüsləri” adlı tədbir keçirilib.
Crossmedia.az xəbər verir ki, Agentliyin layihələrin idarə edilməsi departamentinin müdiri Elnur Bağırlı Azərbaycandakı mina probleminə diqqət çəkib:
"Agentliyin fəaliyyətində mina problemlərinin işıqlandırılması, Azərbaycanın mina problemlərinin dünya ictimaiyyətinə çatdırılması prioritet məsələlərdəndir”.
Açılış nitqindən sonra çıxışçılar Qeyri-Hökumət Təşkilatlarına Dövlət Dəstəyi Agentliyinin yardımı ilə mina təhlükəsinə dair silsilə hesabatları təqdim ediblər.
Beynəlxalq Avrasiya Mətbuat Fondunun rəhbəri Umud Mirzəyev Azərbaycanda mina terroru ilə mübarizə məsələlərindən danışıb. O bildirib ki, burada dövlət qurumları ilə yanaşı, vətəndaş cəmiyyəti də mühüm rola malikdir.
"Çıraq" Humanitar və İnkişaf Ictimai Birliyinin sədri Nadir Cəfərov Azərbaycanda mina qurbanlarına dövlət qayğısından bəhs edib.
Onun sözlərinə görə, agentliklə birgə bu istiqamətdə bir çox layihələr həyata keçirilməkdədir:
“Mina problemi Azərbaycan üçün ən böyük problemlərdəndir. Ona görə də bu kimi layihələrə həm dəstək, həm də maarifləndirmə tədbirləri zəruridir”.
“Minalar Əleyhinə Azərbaycan Kampaniyası" İctimai Birliyinin sədri Hafiz Səfixanov təşkilatın 27 şəhər və rayonda həyata keçirdiyi layihələrdən bəhs edib.
Onun sözlərinə görə, bu layihələrdə ümumilikdə 594 nəfər mina qurbanı iştirak edib:
“Bəzi bölgələrdə mina qurbanı olan şəxslər üçün arıçılıq və heyvandarlıq təsərrüfatı yaradılıb”.
Çıxışlar bitdikdən sonra tədbir ümümi müzakirələrlə davam etdirilib.
12:06 04.04.2025
Oxunuş sayı: 9463
