ABŞ Dövlət katibinin açıqlaması Ukraynanı Krım itkisiylə razılaşdırmağa hesablanıb - RƏY
ABŞ-nin dövlət katibi Marko Rubionun sözlərinə görə, Ukraynanın Rusiya qüvvələrini 2014-cü ildən əvvəlki mövqelərinə qaytarması “çox çətin” görünür. Bu bəyanat beynəlxalq ictimaiyyətdə Ukraynanın ərazi bütövlüyünü bərpa etmək üçün qarşılaşdığı çətinliklər və münaqişənin hərbi həllinin mümkünsüzlüyü ilə bağlı müzakirələri yenidən alovlandırıb.
Bəs Ukraynanın işğal olunmuş ərazilərini geri qaytarmasına mane olan əsas faktorlar hansılardır? ABŞ və Ukrayna bu çətinlikləri aradan qaldırmaq üçün hansı addımları ata bilər?
Mövzu ilə bağlı politoloq Mütəllim Rəhimli Crossmedia.az-a açıqlama verib: "ABŞ-nin dövlət katibi açıqlamasında təkcə mövcud durumu şərh etməyib, həmçinin öz ölkəsinin baxışlarını da ifadə edib. O göstərməyə çalışır ki, Ukraynaya bundan sonra tələb olunan yardımı etmək istəmirlər. Zatən Birləşmiş Ştatlar və müttəfiqləri Ukraynanın qalib gəlməsi üçün çalışmayıblar. Göstərdikləri yardımlar yetərli olmayıb, yaxud da fasilələrlə edilib. Bu da Ukraynaya cəbhədə irəliləyiş əldə etməyə imkan verməyib".
Politoloq həmçinin bildirib: "Belə görünür ki, ABŞ-yə qalib tərəf lazım deyil. Trampın davamlı açıqlamalarından da belə çıxir ki, Birləşmiş Ştatlar zəifləmiş və ərazisinin 20 faizə qədəri işğal olunmuş Ukraynanı tamamilə öz təsiri altına almaq istəyir. Avropa Birliyi də Ukraynaya etdiyi yardimların müqabilində pay bölgüsündə iştirak etmək arzusundadır. Lakin Birləşmiş Ştatlar ona tək sahib olmaq istəyindən güzəştə getmir. Bu da onlar arasında münasibətlərin gərginləşməsinə səbəb olur. Rubio 2014-cü ildəki sərhədlərə qayıtmağın mümkünsüzlüyünü deyəndə Krımın itirildiyi ilə barışmağı təklif edir. Hətta Ukraynanın hazırda işğal altındakı bir çox ərazilərinin də geri qaytarılmasının real olmadığına işarə vurub. Və Ukraynanı faktiki olaraq məğlub vəziyyətində Rusiya ilə atəşkəsə sürükləməkdədir. Bu isə Ukraynaya yaxşı heç nə vəd etmir".
Ayhan Ağarzayev
13:00 12.03.2025
Oxunuş sayı: 3280
