Rusiya ölkəmizə qarşı tərbiyəsiz kampaniya aparır – SƏRT AÇIQLAMA
Son zamanlar Azərbaycan-Rusiya münasibətlərində mövcud olan gərginlik şimal qonşumuzdakı müxtəlif ictimai-siyasi şəxslərin məsuliyyətsiz davranış və açıqlamalarıyla yadda qalmaqdadır. Rusiya Dövlət Dumasının Turizm Komitəsi sədrinin birinci müavini Nikolay Valuyevin Azərbaycan dövləti və xalqı əleyhinə təhqiramiz ifadələri narazılığa səbəb olub. Bu hadisə Azərbaycan Xarici İşlər Nazirliyi tərəfindən Valuyevin ölkəmizə girişinə qadağa qoyulması ilə nəticələnib. Sözügedən mövzu ilə bağlı Milli Məclisin deputatları Musa Quliyev və Asim Mollazadə Crossmedia.az-a açıqlama veriblər.
Deputat Musa Quliyev Rusiyada bəzi uzağı görə bilməyən siyasətçilərin çıxışlarının Azərbaycan-Rusiya münasibətlərinə mənfi təsir etdiyini bildirib. O qeyd edib ki, Nikolay Valuyevin Azərbaycan dövləti və xalqı haqqında təhqiramiz çıxışları haqlı narazılığa səbəb olub. Deputatın sözlərinə görə Xarici İşlər Nazirliyi tərəfindən onun ölkəmizə girişinə qadağa qoyulması düzgün addımdır.
Deputatın fikrincə, iki ölkə arasındakı münasibətlərin gələcək inkişafı Rusiyanın siyasətindən asılıdır. Xüsusilə təyyarə qəzası ilə bağlı suallara cavab verilməsi və təzminat məsələsində çeviklik göstərilməsi atılması vacib olan addımdır. O vurğulayıb ki, Rusiya prezidenti Vladimir Putin qəza ilə bağlı üzr istəsə də, sonrakı addımlar uyğun şəkildə atılmayıb.
Musa Quliyev Valuyev kimi şəxslərin açıqlamalarının Azərbaycan-Rusiya siyasətinə mənfi təsir etdiyini bildirib. O, Valuyevin vaxtilə erməni məşqçisi Qabrielyanın təsiri altında anti-Azərbaycan mövqeyi tutduğunu və akromeqaliya xəstəliyindən əziyyət çəkdiyini qeyd edib. Belə şəxslərin Rusiya siyasətinin güzgüsü kimi çıxış etməsinin dünya ictimaiyyəti üçün narahatlıq yaratdığını vurğulayan deputat, bunun Rusiyanın təklənməsinə səbəb olacağını qeyd edib.
Deputat Asim Mollazadə isə Rusiyanın beynəlxalq hüquq normalarına uyğun olmayan davranışlarını tənqid edib. O bildirib ki, Rusiya özünü imperiya kimi aparmağa çalışır və Ukraynadakı müharibə ilə artıq beynəlxalq aləmdə təcrid olunmaq təhlükəsi ilə üzləşib. Mollazadə vurğulayıb ki, Rusiya belə davam edərsə, hətta bəzi terrorçu dövlətlər belə ona dəstək verməyəcək.
Deputat AZAL-ın təyyarəsinin vurulmasını da Rusiyanın bu yanlış siyasətinin bir nəticəsi kimi qiymətləndirib. Onun sözlərinə görə, Rusiya Azərbaycanın haqlı tələblərinə qarşı tərbiyəsiz kampaniya aparmağa çalışsa da, ölkəmiz beynəlxalq hüquqa əsaslanan mövqeyini qorumağa davam edəcək.
17:38 10.02.2025
Oxunuş sayı: 8043
