Türkdilli ölkələr diplomatik əlaqələri daha da güclənir: “Birləşməliyik!”
Azərbaycan xarici işlər naziri Ceyhun Bayramov Azərbaycan-Türkiyə-Özbəkistan xarici işlər, iqtisadiyyat/ticarət və nəqliyyat nazirlərinin 2-ci üçtərəfli görüşü çərçivəsində özbəkistanlı həmkarı Baxtiyor Saidov ilə görüşüb.
Türk dövlətləri arasında keçirilən görüş bu ölkələr arasında beynəlxalq məsələlərin müsbət perspektivdən inkişafına, eyni zamanda xarici məsələlərin tərəqqisinə təkan verir. Müttəfiqlik münasibətləri çərçəsində baş tutan danışıqlar ölkələr arasında qarşılıqlı faydalı əlaqələrin qurulmasında mühüm rol oynayıb. Görüşdə, həmçinin xarici məsələlərin inkişafına da təkan verərək siyasi, iqtisadi, ticarət, enerji, nəqliyyat-kommunikasiyalar, mədəni-humanitar aspektlərinin daha da zənginləşdirilməsi ilə bağlı müzakirələr aparılıb.
Mövzu ilə bağlı Crossmedia.az-a açıqlama verən Azərbaycan Milli Məclisinin deputatı Sabir Rüstəmxanlı Türkdilli dövlətlər arasında əlaqələrin perspektivinə toxunub: “Ölkələr arasında bir çox sahələrdə əməkdaşlıq perspektivləri müzakirə olunub. Həmçinin xüsusilə əsas sahələr üzrə birgə fəaliyyət göstərmək barədə danışıqlar aparılıb. Müəyyən sənədlər də imzalanıb. Əslində, bu yeni bir təcrübə deyil. Çünki həm Azərbaycan-Türkiyə, həm də Azərbaycan-Özbəkistan arasında belə sənədlər artıq mövcuddur. İndi bu əlaqələr daha da gücləndirilərək mükəmməlləşdiriləcək və gələcəkdə bu yolda irəliləyişlər planlaşdırılacaq. Bu, çox önəmli bir addımdır. Həm Ankara ilə, həm də Dəməşqin Bakı ilə tarixən formalaşmış qardaşlıq əlaqələri mövcuddur”.
Deputatın sözlərinə görə, tarixdə, xüsusilə də müstəqil dövlətlər yaranmadan əvvəl, xalqların bir-birinə yaxınlığı və qarşılıqlı əlaqələri önəmlidir: “Məsələn, Azərbaycan və Özbəkistan, adları belə olmasa da, Qaraxanlılar dövründən, Teymur dövründən etibarən bir-birinə yaxın olmuş, müharibələr və qarşıdurmalar yaşanmışdır. Ancaq sonralar həmşəri xalqlar bir-birinə yaxınlıq göstərmişdir. Bu diplomatik münasibətlər, ümumi münasibətlər şəklində ifadə edilsə də, tarixdə başqa formalarda da mövcud olmuşdur. Bu formalar daxilində, Azərbaycan ilə Özbəkistan, hətta Azərbaycan ilə Osmanlı İmperatorluğu arasında da qarşılıqlı əlaqələr olmuşdur. Bu gün isə XX əsrdə başlanğıcı qoyulan müstəqillik dövründə bu əlaqələri yenidən inkişaf etdirmək və gücləndirmək son dərəcə əhəmiyyətlidir”.
S.Rüstəmxanlı qeyd edib ki, bu, həm də Türk dünyasının və Türk Dövlətləri Təşkilatının tərkibində inteqrasiya proseslərinin güclənməsinə xidmət edəcək : “Bu region Türk regionudur. Ağ dənizdən Çin səddinə qədər uzanır. Türk xalqları tarixən bir-birindən ayrılıb, amma bu gün 7 rəsmi Türk dövləti mövcuddur. Onların birləşməsi çox vacibdir. Dünyada Avropa İttifaqı, Ərəb Dövlətləri Birliyi və digər regionlarda birləşmiş dövlətlər mövcuddur. Biz də Türk xalqları olaraq tarixən ortaq köklərdən, mədəniyyətdən və dilindən güc alaraq birləşməliyik. Bu xalqların böyük iqtisadi potensialı vardır və dünyada ən əlverişli bölgələrdə yerləşirlər. Birlikdə olduqda bu gücü daha da artırarlar. Ayrılıqdan istifadə edənlər isə bu xalqları zəiflətmək və parçalamaq istəyirlər. Ancaq birlikdə olduqda bu xalqlar öz haqlarını qoruyub, daha güclü olacaqdır”.
Fidan Hacızadə
15:58 29.01.2025
Oxunuş sayı: 6107
