Yeni sistem yaranır: Nüvə silahının tətbiqi gündəmdədir
Rusiya növbəti dəfə nüvə müharibəsi barədə xəbərdarlıq edib. Belə ki, Rusiya Təhlükəsizlik Şurasının katibi Sergey Şoyqu TASS-a müsahibəsində bildirib ki, beynəlxalq arenada böyük dövlətlər arasında geosiyasi rəqabət kəskinləşir, nüvə dövlətlərinin iştirakı ilə hərbi toqquşma riskləri artır.
"Dünyada münaqişələrin artması və geosiyasi rəqabətin kəskinləşməsi fonunda böyük dövlətlər arasında, o cümlədən nüvə dövlətlərinin iştirakı ilə hərbi toqquşma riskləri artır", - o qeyd edib.
Rəsmi Moskva indiyə kimi dəfələrlə nüvə müharibəsi barədə xəbərdarlıq etsə də, hələ ki, bu silahı tətbiq etməyib. Bu, beynəlxalq aləmdə Kremlin sözünə inamı azaldır, onu etibarsız aktora çevirir.
S.Şoyqunun bu dəfəki xəbərdarlığını Crossmedia.az-a şərh edən beynəlxalq münasibətlər üzrə ekspert Əziz Əlibəyli bildirib ki, beynəlxalq rəqabətin əsas səbəbi güc sahibi olmaqdır: “İndiki şəraitdə yeni güclər yaranır. Sonuncu dəfə dünyanın müasir mənzərəsi 1945-ci ildə II Dünya Müharibəsinin nəticələrinə görə müəyyən olunmuşdu. Amma o dövrdən sonra iki ölkə, məsələn, Fransa və Britaniya artıq regional dövlətə çevriliblər. Bu mənada onların yerini daha qlobal güclənən aktorlar tutur. Ümumiyyətlə, indiki dönəmdə "beşlik formatı" artıq özünü doğrultmur. Əlbəttə ki, güc parametrləri ölkələrin əhalisinə və bu kimi faktorlara görə hesablanırsa, gərək Hindistanı, Braziliyanı, Türkiyəni və İndoneziyanı da bu yanaşmaların içində görək. Bir sözlə, yeni sistem yaranır”.
Ekspertin sözlərinə görə, nüvə silahlarının mövcudluğu aktiv müharibələri, yəni birbaşa toqquşmaları istisna edir, amma bütövlükdə toqquşmaların qarşısını almır. Bu isə müvəkkil savaşlarını aktuallaşdırır.
Elnurə Kərimova
16:56 24.01.2025
Oxunuş sayı: 12731
