Trampın sosial şəbəkəsi 100 min dollarlıq xidmət təklif edir
ABŞ Prezidenti Donald Trampın təsis etdiyi “Truth Social” sosial şəbəkəsi onun paylaşımlarına daha sürətli çıxış imkanı verən pullu xidmət üçün “Bloomberg” və iki iri maliyyə şirkəti ilə razılaşma əldə edib. Xidmətin aylıq qiyməti 100 min ABŞ dollarına çata bilər.
Crossmedia.az xəbər verir ki, “Reuters” agentliyi bu barədə məsələdən birbaşa məlumatı olan mənbələrə istinadən məlumat yayıb.
Razılaşmaya əsasən, “Bloomberg”, “Susquehanna International Group” və “Jump Trading” şirkətləri “Truth API” adlı xidmət vasitəsilə Trampın paylaşımlarını digər istifadəçilərdən daha tez əldə edə biləcəklər.
“Susquehanna” və “Jump Trading” alqoritmik və avtomatlaşdırılmış əməliyyatlar həyata keçirən yüksək tezlikli ticarət şirkətləridir.
Nəşr qeyd edir ki, ABŞ Prezidentinin sosial şəbəkədəki açıqlamaları maliyyə bazarlarına təsir göstərə bildiyindən bu xidmət abunəçilərə digər investorlar qarşısında vaxt üstünlüyü qazandıra bilər.
“Trump Media & Technology Group” sözügedən məhsulu iyul ayında təqdim edib.
Xidmətin tətbiqi hüquqi mübahisələrə də səbəb olub. Avqust ayında “Intercept Media” və “Freedom of the Press Foundation” rəsmi hökumət məlumatlarına pullu erkən çıxış imkanının yaradılmasına qarşı məhkəməyə müraciət ediblər.
İddiaçılar hesab edirlər ki, dövlət məlumatlarına çıxışda maliyyə üstünlüyünün yaradılması konstitusiya prinsiplərinə zidd ola və iri maliyyə şirkətlərinə üstünlük verə bilər.
“Bloomberg”, “Jump Trading” və “Susquehanna” məsələyə münasibət bildirməkdən imtina ediblər.
“Trump Media” isə açıqlamasında “Truth Social”un müxtəlif sahələrdə tələbat olan standart API xidməti təqdim etdiyini bildirib. Şirkət “Reuters”in məlumatının anonim mənbələrdən alınmış yanıltıcı iddialara əsaslandığını irəli sürüb.
Nəşrin məlumatına görə, Tramp ailəsinin etimad fondu “Trump Media”nın səhmlərinin 41 faizinə sahibdir. Prezident həmin fondun yeganə benefisiarıdır.
Şirkətin səhmləri ilin əvvəlindən 50 faizdən çox ucuzlaşıb. Hazırda onun bazar dəyəri təxminən 1,8 milyard dollar təşkil edir.
13:22 29.10.2026
Oxunuş sayı: 50
