Avropa Komissiyası “Şimal axını” ilə bağlı mövqeyini açıqlayıb
Avropa İttifaqı (Aİ) Ukraynada müharibə başa çatdıqdan sonra belə, “Şimal axını” qaz kəməri vasitəsilə Rusiyadan təbii qaz idxalının bərpasını dəstəkləmir.
Crossmedia.az xəbər verir ki, bu barədə Avropa Komissiyasının baş sözçüsü Paula Pinyo məlumat yayıb.
Pinyo bildirib ki, Avropa Komissiyası Rusiya və ABŞ-nin “Şimal axını” layihəsini yenidən işə salmaq istiqamətində mümkün təşəbbüslərinə qarşıdır.
“Biz Rusiyadan qazıntı yanacaqları almağın və onlardan asılı olmağın gizli bədəlini çox yaxşı bilirik. Enerji resurslarından silah kimi istifadə olunub və biz bunun əvəzini ödəmişik. Buna görə də baş verənləri unutmuruq”, – deyə o vurğulayıb.
Avropa Komissiyasının nümayəndələri xatırladıblar ki, Aİ-də Rusiya qazının idxalının mərhələli şəkildə dayandırılmasını nəzərdə tutan qanunvericilik qəbul edilib.
Plana əsasən, Rusiyadan mayeləşdirilmiş təbii qazın (LNG) uzunmüddətli müqavilələr üzrə idxalı 2027-ci ilin yanvarınadək, boru kəmərləri vasitəsilə qaz tədarükü isə həmin ilin sentyabrınadək dayandırılmalıdır.
Avropa Komissiyasının enerji məsələləri üzrə sözçüsü Anna-Kaysa İtkonen bildirib ki, Aİ Rusiya qazından və LNG-dən mərhələli şəkildə imtina edir.
Bundan əvvəl Rusiya Prezidenti Vladimir Putin Almaniyanın razılığı olacağı təqdirdə “Şimal axını” vasitəsilə qaz tədarükünün bərpasının mümkünlüyünü bildirmişdi.
14:01 29.10.2026
Oxunuş sayı: 58
