İranın nüvə və enerji obyektləri hədəfə alına bilər
ABŞ və İsrail hərbçiləri İran rəhbərliyini, enerji və nüvə obyektlərini, eləcə də ölkənin infrastrukturunu hədəf ala biləcək genişmiqyaslı hərbi əməliyyatlara hazırlıq görürlər.
Crossmedia.az xəbər verir ki, “Axios” nəşri bu barədə ABŞ və İsraildəki məlumatlı rəsmilərə istinadən məlumat yayıb.
Nəşrin məlumatına görə, Vaşinqton və Tehran arasında son anda razılaşma əldə olunmasa, İrana qarşı yeni hava zərbələri noyabrın 3-də keçiriləcək ABŞ Konqresinə aralıq seçkilərindən sonra başlaya bilər.
Oktyabrın 26-da İsrail Silahlı Qüvvələrinin Baş Qərargah rəisi, general Eyal Zamir ABŞ Mərkəzi Komandanlığının (CENTCOM) rəhbəri, admiral Bred Kuperlə mümkün hərbi əməliyyatların koordinasiyasını müzakirə edib.
Amerikalı və israilli rəsmilərin sözlərinə görə, mümkün əməliyyatın təxminən bir həftə davam edəcəyi, İran rəhbərliyinin, enerji, nüvə və infrastruktur obyektlərinin hədəf alınacağı gözlənilir.
ABŞ Prezidenti Donald Tramp oktyabrın 28-də “Axios”a açıqlamasında İranla danışıqların vasitəçilər üzərindən aparıldığını təsdiqləyib. Bununla belə, danışıqların nəticə verib-verməyəcəyini bilmədiyini vurğulayıb.
Məlumata əsasən, diplomatik vasitəçilik səylərinə Qətər rəhbərlik edir. Pakistan, Səudiyyə Ərəbistanı, Misir və Türkiyə də bu təşəbbüsü dəstəkləyir.
Vasitəçilər İranın nüvə obyektlərinə beynəlxalq müfəttişlərin buraxılması müqabilində ABŞ sanksiyalarının müəyyən qədər yumşaldılmasını nəzərdə tutan təkliflər üzərində işləyirlər.
İranın xarici işlər naziri Abbas Əraqçi isə ölkəsinin müdafiəyə hazır olduğunu, eyni zamanda diplomatik həll imkanlarını nəzərdən keçirməyə davam etdiyini bildirib.
Qeyd edək ki, mümkün hərbi əməliyyatla bağlı yekun qərarın qəbul edildiyi rəsmən açıqlanmayıb.
14:21 29.10.2026
Oxunuş sayı: 55
