Ukrayna döyüş təyyarələrində də “Starlink”dən istifadə edir
Ukrayna Hərbi Hava Qüvvələri taktiki aviasiyada etibarlı rabitə və peyk interneti təmin etmək üçün “Starlink” texnologiyasından istifadə edir.
Crossmedia.az xəbər verir ki, Ukrayna Hərbi Hava Qüvvələrinin sözçüsü Yuri İqnat bu barədə “RBC-Ukrayna”nın “ETO BAZA” podkastında bildirib.
“Taktiki aviasiya da etibarlı rabitə və peyk interneti üçün ‘Starlink’dən istifadə edə bilər və ya artıq istifadə edir. Bütün təfərrüatları açıqlamaq istəmirəm”, – deyə İqnat vurğulayıb.
Bu, Ukrayna Hərbi Hava Qüvvələrinin rəsmi nümayəndəsinin taktiki aviasiya təyyarələrində “Starlink” texnologiyasından istifadə barədə ilk açıq açıqlaması kimi təqdim olunur.
Yuri İqnatın sözlərinə görə, sistem Ukrayna helikopterlərinin Rusiya pilotsuz uçuş aparatlarını (PUA) ələ keçirməsinə də kömək edir.
“Starlink” helikopter ekipajları ilə yerdəki döyüş idarəetmə zabitləri arasında sabit məlumat mübadiləsini təmin edir. Bu isə hava hədəflərinin müəyyənləşdirilməsi və ekipajların onlara istiqamətləndirilməsi baxımından əhəmiyyət daşıyır.
Sistemin istifadə olunduğu digər istiqamət reaktiv pilotsuz uçuş aparatlarının ələ keçirilməsi üçün nəzərdə tutulan dronlardır.
İqnat qeyd edib ki, “Starlink”in sürətinə məhdudiyyət qoyulacağı təqdirdə bu cür aparatlarda sistemdən istifadə çətinləşə və ya qeyri-mümkün ola bilər.
16:15 26.10.2026
Oxunuş sayı: 54
