Moskvanın pul kassası SOS verir: Müharibə Rusiyanı iqtisadi böhrana sürükləyir
Rusiyanın dövlət büdcəsində yaranan kəsir və artan borclanma müharibənin iqtisadi yükünü yenidən gündəmə gətirib. Rusiya Maliyyə Nazirliyinin məlumatına görə, 2026-cı ilin yanvar-avqust aylarında federal büdcə kəsiri 5,795 trilyon rubl təşkil edib və bu göstəricinin il ərzində ÜDM-in 3 faizinə yaxınlaşacağı gözlənilir.
Crossmedia.az-a açıqlamasında politoloq Elçin Xalidbəyli Rusiya-Ukrayna müharibəsinin uzanmasının Rusiyanın iqtisadi və sosial vəziyyətinə təsir etdiyini bildirib. Onun sözlərinə görə, müharibənin davam etdiyi hər gün Moskva üçün əlavə iqtisadi və siyasi təzyiq yaradır: “Rusiya-Ukrayna savaşı Rusiyanın dövlət büdcəsinə günbəgün təsir göstərir. Rusiya artıq bu savaşı maliyyə olaraq qarşılamaqda çətinlik çəkir. Ordunun təchizatı Rusiya üçün ciddi problemlərdən birinə çevrilib. Ən önəmlisi isə Rusiya iqtisadiyyatı çöküş nöqtəsinə sürətlə yaxınlaşır”.
Elçin Xalidbəyli iqtisadi zəifləmənin sosial problemlərin artmasına da təsir etdiyini vurğulayıb: “İqtisadi zəifləmə eyni zamanda sosial problemlərin artması ilə nəticələnir və bu, Kreml üçün olduqca çətin vəziyyət yaradır. Təbii ki, müharibə uzandıqca bu problemlərin dərinləşməsi də qaçılmaz olur”.
Politoloq Ukraynanın Rusiya ərazisinin dərinliklərinə endirdiyi zərbələrin enerji sektoruna təsir etdiyini iddia edib: “Son zamanlarda Ukraynanın Rusiyanın dərinliklərinə endirdiyi zərbələr Rusiya iqtisadiyyatı üçün dağıdıcı təsirlər göstərir. İlk növbədə neft emalı zavodlarının, yəni enerji infrastrukturunun sıradan çıxarılması Rusiyada böhran prosesini sürətləndirir. Böhran dərinləşməkdə davam edir. Enerjinin çatışmazlığı Rusiyada həm iqtisadiyyata, həm də insanların sosial həyat şəraitinə ciddi zərbələr vurur”.
Onun sözlərinə görə, enerji infrastrukturuna zərbələr qiymət artımına da təsir göstərir: “Ukraynanın Rusiyanın enerji infrastrukturuna vurduğu zərbələr Rusiyada bahalaşmanı daha da dərinləşdirir. Bu, ərzaqdan tutmuş digər sahələrə qədər təsir göstərməyə başlayıb. Bütün bunları ümumiləşdirdikdə, hazırda Rusiya Rusiya-Ukrayna müharibəsinin bütün ağırlığını öz üzərində hiss edir”.
Politoloq hesab edir ki, müharibənin davam etdiyi müddətin hər bir günü Rusiya üçün əlavə təzyiq yaradır: “Artıq məsələnin müharibənin bir il, iki il və ya bir ay uzanmasından getdiyini düşünmürəm. Müharibənin davam etdiyi hər gün belə Rusiya üçün sarsıdıcı zərbələr vurur. Bütün bunlar Rusiyanın gələcək taleyini birbaşa risk altına salır”.
Elçin Xalidbəyli Kremlin əsas məqsədlərindən birinin müharibədən mümkün qədər az itki ilə çıxmaq olduğunu bildirib: “İndi Kreml üçün əsas hədəflərdən biri Ukrayna ilə müharibədən mümkün qədər az itki ilə çıxmaqdan ibarətdir. Kremlə yaxın siyasi çevrələr bu barədə artıq açıq danışmağa başlayıblar. Lakin problem ondadır ki, Ukrayna müharibəni Rusiya ərazisinə daşıya bildiyindən, eyni zamanda hərbi-siyasi üstünlüyü ələ keçirdiyindən, rəsmi Kiyev artıq əvvəlki şərtlər çərçivəsində sülh danışıqları aparmaqdan imtina edir”.
O, Kiyevin Rusiya tərəfindən irəli sürülən tələbləri qəbul etmədiyini və öz şərtlərini önə çıxardığını söyləyib: “İlk növbədə Kremlın neo-imperial tələblərini, şərtlərini rədd edir və Zelenski administrasiyası indi müharibənin dayandırılması üçün Ukraynanın şərtlərini diktə etməyə çalışır. Bu da Kreml üçün növbəti çıxılmaz vəziyyətin başlanğıcı deməkdir”.
Politoloq hesab edir ki, müharibənin dayandırılması ilə bağlı proses Ukraynanın ərazi bütövlüyü məsələsindən asılı olacaq: “Rəsmi Kiyevin son bəyanatları göstərir ki, müharibənin yalnız Ukraynanın beynəlxalq hüquqla tanınmış ərazi bütövlüyü və sərhədləri bərpa edildikdən sonra başa çatması mümkündür. Yəni Rusiya öz qoşunlarını, Krım da daxil olmaqla, Ukrayna ərazilərindən çıxararaq Rusiya sərhədləri daxilinə çəkmədikcə, bu müharibənin davam etməsi ehtimalı olduqca yüksəkdir”.
Elçin Xalidbəyli sonda müharibənin nə zaman başa çatacağının Rusiyanın qoşunlarını Ukraynadan çıxarmaqla bağlı qərarından asılı olduğunu deyib: “Bu da o deməkdir ki, Rusiya artıq müharibənin dayandırılması müddətini özü müəyyən edə bilər. Yəni qoşunlarını Ukraynadan nə zaman çıxarmaq barədə qərar qəbul edərsə, o zaman bu müharibənin başa çatmasından danışmaq mümkün ola bilər”.
Nigar Xəlilli
17:00 26.09.2026
Oxunuş sayı: 44
