Payızın ilk dolunayı Saturnla birlikdə səmada görünəcək
Payız fəslinin ilk dolunayı bu həftəsonu ən parlaq mərhələsinə çatacaq və eyni vaxtda Saturn planetini də müşahidə etmək mümkün olacaq.
Crossmedia.az xəbər verir ki, “CNN” bu barədə məlumat yayıb.
Məlumata görə, Ay şənbə günü Bakı vaxtı ilə axşam saatlarında ən parlaq görüntüsünü alacaq və günəş batdıqdan sonra onu müşahidə etmək daha əlverişli olacaq. Saturn isə cümə günündən bazar ertəsinə qədər dolunaya yaxın ərazidə qızılı rəngli parlaq obyekt kimi görünəcək.
Saturn oktyabrın 4-də Yerə və Günəşə nisbətən xüsusi mövqeyə — qarşıdurma (oppozisiya) vəziyyətinə çatacaq. Bu zaman planet Yerə orbit üzrə ən yaxın məsafələrdən birində olacaq və səmada daha böyük və parlaq görünəcək.
Neptun da Ayın yaxınlığında görünə bilər. Lakin Günəş sisteminin bu uzaq qaz nəhəngini adi gözlə müşahidə etmək daha çətindir. Onu görmək üçün durbin və ya teleskop, eləcə də işıq çirklənməsindən uzaq və açıq səma tələb olunur.
Buludlu hava müşahidəyə mane olarsa, Ay cümə və bazar günü axşamları da demək olar ki, dolunay şəklində görünəcək.
Sentyabrın dolunayı ənənəvi olaraq “qarğıdalı ayı” adlandırılır. Bu ad həmin dövrdə fermerlərin qarğıdalı məhsulunu yığması ilə əlaqələndirilir. ABŞ-ın şimal-şərqində yaşayan abenaki xalqı onu “qarğıdalı yaradan ay”, assiniboinlər isə “sarı yarpaq ayı” adlandırırlar.
Bu il sentyabr dolunayı payız bərabərliyi tarixinə çox yaxın düşdüyü üçün daha çox “məhsul ayı” kimi tanınır. Payız bərabərliyi Şimal yarımkürəsində payız fəslinin rəsmi başlanğıcı hesab olunur.
“Məhsul ayı” adı isə qədim dövrlərdə fermerlərin Ayın güclü işığından gün batdıqdan sonra da məhsul yığımını davam etdirmək üçün istifadə etməsi ilə bağlıdır.
03:44 26.09.2026
Oxunuş sayı: 34
