Xarici xəbərlər

İran ABŞ-a 7 günlük plan təklif edib

İran ABŞ-ə hərbi əməliyyatların dayandırılması, Hörmüz boğazının açılması və daha sonra nüvə proqramı ilə bağlı genişmiqyaslı danışıqlara başlanmasını nəzərdə tutan 7 günlük plan təqdim edib.

Crossmedia.az xəbər verir ki, “The New York Times” bu barədə məlumat yayıb.

İranın xarici işlər naziri Abbas Əraqçi BMT Baş Assambleyasının 81-ci sessiyası çərçivəsində Nyu-Yorkda keçirdiyi brifinqdə bildirib ki, təklif ABŞ-ə vasitəçilər üzərindən çatdırılıb.

Əraqçinin sözlərinə görə, müəyyən şərtlərin yerinə yetirilməsi halında Hörmüz boğazı yeddinci günün sonunda gəmiçilik üçün açılacaq və nüvə danışıqları bərpa ediləcək.

İran rəsmisi təklifin iyun ayında ABŞ və İran arasında əldə olunan, lakin qısa müddət sonra qüvvədən düşən anlaşma memorandumunda nəzərdə tutulan öhdəliklərə böyük ölçüdə uyğun olduğunu bildirib. O, Vaşinqtonun planı qəbul edəcəyi təqdirdə Tehran tərəfindən dərhal icra olunmağa hazır olduğunu deyib.

Əraqçi həmçinin ABŞ-də keçiriləcək aralıq seçkilərindən əvvəl razılaşmanın əldə olunmasının daha məqsədəuyğun olacağını qeyd edib.

ABŞ administrasiyası ilə bağlı məlumatlı amerikalı rəsmiyə görə isə Vaşinqton vasitəçilər vasitəsilə İranla müsbət və konstruktiv təmaslar aparır. Bununla belə, rəsmi ABŞ-nin razılaşma əldə etmək üçün tələsməyəcəyini bildirib.

🖨 Çap et

01:40 26.09.2026

Oxunuş sayı: 39