Xarici xəbərlər

Finlandiya və Ukrayna arasında yeni müdafiə razılaşması

Finlandiya və Ukrayna müdafiə sahəsində əməkdaşlığın genişləndirilməsini nəzərdə tutan saziş imzalayıb. Razılaşma çərçivəsində birgə dron istehsalının yaradılması imkanının açıldığı bildirilir.

Crossmedia.az xəbər verir ki, “Ilta-Sanomat” bu barədə məlumat yayıb.

Saziş Finlandiya Prezidenti Aleksandr Stubb və Ukrayna Prezidenti Vladimir Zelenski tərəfindən çərşənbə günü axşam Nyu-Yorkda BMT-nin qərargahında imzalanıb. Stubb razılaşmanı “dron sazişi” adlandıraraq onun müdafiə məhsullarının birgə istehsalına imkan verəcəyini bildirib.

Finlandiya Prezidentinin sözlərinə görə, Ukraynadakı müharibədən əldə olunan təcrübə ölkənin öz müdafiə imkanlarının inkişafına kömək edə bilər. O, Finlandiya şirkətləri ilə Ukraynadakı tərəfdaşlar arasında əməkdaşlığın sürətlə qurulmasının vacib olduğunu vurğulayıb.

Finlandiya Müdafiə Nazirliyinin məlumatına görə, saziş texnologiya və məlumat mübadiləsini, həmçinin tədqiqat və inkişaf sahəsində birgə fəaliyyəti nəzərdə tutur. Danışıqlar yay və payızın əvvəlində aparılıb.

Finlandiyanın Baş naziri Petteri Orpo bildirib ki, Ukraynanın müdafiə sənayesinin inkişafından öyrəniləsi məqamlar var. Onun sözlərinə görə, razılaşma həm Ukrayna Silahlı Qüvvələrinə dəstək verəcək, həm də Finlandiyanın sənayesinə və müdafiə qüvvələrinə gələcəyin daha texnoloji münaqişələrinə hazırlaşmaq imkanı yaradacaq.

Məlumata görə, Ukrayna daha əvvəl Norveç, Danimarka və Baltikyanı ölkələr də daxil olmaqla, təxminən 10 ölkə ilə analoji dron sazişləri imzalayıb. Yeni razılaşmanın detalları açıqlanmayıb.

🖨 Çap et

12:24 24.09.2026

Oxunuş sayı: 44