Bakı yenidən Formula 1-in mərkəzində: Qran-Prinin startı verilir
Bu gün Bakının sayca onuncu dəfə ev sahibliyi edəcəyi Formula 1 Azərbaycan Qran-Prisinə start veriləcək.
Crossmedia.az xəbər verir ki, yarış həftəsonu saat 10:45-də Formula 2 üzrə sərbəst yürüşlə başlayacaq. Formula 1-də ilk sərbəst yürüş isə saat 12:30-da start götürəcək.
Daha sonra Formula 2-də iki sıralama turu keçiriləcək. İlk yarış gününə Formula 1 üzrə ikinci sərbəst yürüşlə yekun vurulacaq.
Sentyabrın 25-də Formula 1 üzrə sərbəst yürüşlər və Formula 2 üzrə sprint yarışı keçiriləcək. Sentyabrın 26-da isə əsas yarış baş tutacaq.
10 komandadan 20 pilotun birincilik uğrunda mübarizə aparacağı Bakı trasının uzunluğu 6 kilometrdir. Bakı Şəhər Halqasında Luis Hemilton, Corc Rassel, Maks Ferstappen, Şarl Lekler və digər məşhur pilotlar yarışacaqlar.
Formula 1 təqvimindəki ən uzun treklərdən biri olan Bakı trasında 20 döngə var. Azadlıq meydanından başlayan trek Hökumət Evinin ətrafı ilə hərəkət edərək Qız qalasına çatmaq üçün İçərişəhər ətrafında 2,2 kilometrlik dairə edir və Neftçilər prospektindən keçərək başlanğıc nöqtəsində başa çatır.
51 dövrədən ibarət trekin ən geniş hissəsi 13 metr, ən dar bölməsi isə İçərişəhər ətrafında, o cümlədən 7-ci və 8-ci döngələrdə 7,6 metrdir. Saat əqrəbinin əks istiqamətində hərəkət edilən trek məşhur almaniyalı memar Hermann Tilke tərəfindən hazırlanıb.
Yarış zamanı pilotlar və milyonlarla televiziya tamaşaçısı UNESCO-nun Ümumdünya Mədəni İrs Siyahısına daxil edilmiş İçərişəhəri, paytaxtın müasir memarlıq abidələrini və Xəzər sahilinin mənzərələrini görmək imkanı əldə edəcəklər.
Yarışın start və finiş xətləri Azadlıq meydanında yerləşir. Burada həmçinin “Paddok klub”, komandaların boksları və pit-leyn qurulub.
Bu il Bakı Şəhər Halqasında yeni tribuna da quraşdırılıb. “City” adlanan tribuna Azərbaycan Dövlət Akademik Musiqili Teatrının qarşısında yerləşir və 678 tamaşaçı tutumuna malikdir. Yeni tribunanın istifadəyə verilməsi ilə BŞH-də tribunaların ümumi tamaşaçı tutumu 21 mini keçib.
Qeyd edək ki, Azərbaycan 2016-cı ildən dünyanın ən nüfuzlu avtoidman yarışlarından biri olan Formula 1-ə ev sahibliyi edir. Ölkəmizdə keçirilən ilk yarış Avropa Qran-Prisi adlandırılıb və həmin yarışda almaniyalı Niko Rosberq qalib olub.
Sonrakı illərdə Daniel Rikkardo, Luis Hemilton, Valtteri Bottas, Serxio Peres, Maks Ferstappen və Oskar Piastri Bakı Qran-Prisində qalibiyyət əldə ediblər. Yalnız 2020-ci ildə Azərbaycan Qran-Prisi koronavirus pandemiyası səbəbindən keçirilməyib.
08:57 24.09.2026
Oxunuş sayı: 52
