Xarici xəbərlər

Süni intellektin təkmilləşdirilməsi risk yarada bilər

Süni intellektin özünü tam müstəqil şəkildə öyrətməyə və təkmilləşdirməyə başlamasının bəşəriyyət üçün ciddi və gözlənilməz nəticələr doğura biləcəyi barədə xəbərdarlıq edilib.

Crossmedia.az xəbər verir ki, bu barədə “Business Insider” məlumat yayıb.

“Anthropic” şirkətinin həmtəsisçisi və baş elmi işçisi Cared Kaplan hesab edir ki, süni intellekt sistemlərinin nəzarətsiz şəkildə öz imkanlarını inkişaf etdirməsi kəskin “kəşfiyyat partlayışına” səbəb ola bilər. Onun fikrincə, bu mərhələyə keçidin 2027–2030-cu illər arasında baş verməsi mümkündür.

Kaplanın sözlərinə görə, ən qabaqcıl süni intellekt modelləri artıq mühəndislərə yeni sistemlərin hazırlanmasında fəal şəkildə kömək edir. Bu səbəbdən sistemlərin müəyyən mərhələdən sonra öz inkişaf prosesində insanlardan daha böyük rol oynaya biləcəyi ilə bağlı narahatlıqlar artır.

Mütəxəssis daha əvvəl “OpenAI”də çalışıb və modellərin miqyası ilə hesablama gücü arasındakı əlaqəni araşdıran tədqiqatlara rəhbərlik edib. 2021-ci ildə isə bir qrup həmkarı ilə birlikdə “Anthropic” şirkətini təsis edib.

Şirkətin baş direktoru Dario Amodei də süni intellektin inkişaf tempinin müəyyən qədər yavaşladılmasının və ciddi nəzarət mexanizmlərinin tətbiqinin vacibliyini vurğulayıb.

Məqalədə həmçinin “OpenAI” rəhbəri Sem Altman və Elon Maskın da süni intellektin nəzarətsiz inkişafının mümkün riskləri barədə əvvəllər xəbərdarlıq etdikləri qeyd olunur. ABŞ-də qanunvericilər də süni intellekt sistemləri üçün yeni təhlükəsizlik standartlarını müzakirə edirlər.

Mövzular:

Süni intellekt Anthropic Cared Kaplan OpenAI ABŞ Elon Mask

🖨 Çap et

23:27 23.09.2026

Oxunuş sayı: 58