Suriyanın Dəra vilayətinə İsrail atəşi açılıb
İsrail qüvvələri Suriyanın Dəra vilayətinin qərb kəndlərinə artilleriya və pulemyotlardan atəş açıb. Hadisə nəticəsində ölən və ya yaralananların olmadığı bildirilir.
Crossmedia.az xəbər verir ki, "SANA" agentliyi bu barədə məlumat yayıb.
Məlumata görə, İsrail qüvvələri Dəra vilayətinin qərbində yerləşən Abidin və Əl-Rəqqad vadilərinə bir neçə artilleriya mərmisi atıb. Yarmuk hövzəsində yerləşən Cəmələ kəndinin ətrafı da atəşə tutulub.
Bundan əlavə, İsrail qüvvələri 1974-cü il qüvvələrin ayrılması xətti boyunca yerləşən mövqelərindən Abidin qəsəbəsinin ətrafına pulemyotlardan atəş açıblar.
Hadisə İsrail ordusunun bundan bir gün əvvəl Suriyanın cənubundakı Qüneytra vilayətinin kənd ərazilərinə iki dəfə artilleriya zərbəsi endirməsindən sonra baş verib. SANA-nın məlumatına görə, həmin hücumlarda Əl-Rafid qəsəbəsinin cənub-şərqindəki ərazi və Bir Əcəm kəndinin meşəlik sahəsi hədəfə alınıb.
Bəşər Əsəd hakimiyyətinin 2024-cü ilin dekabrında devrilməsindən sonra İsrail Suriyanın ərazisində nəzarət etdiyi sahəni genişləndirib, bufer zonanı ələ keçirib və 1974-cü il Qüvvələrin Ayrılması Sazişinin qüvvədən düşdüyünü elan edib.
Həmin sazişə əsasən, Suriya və İsrail qüvvələrinin ayrılması üçün Suriya suverenliyi altında bufer zona yaradılıb. Sazişin icrasına BMT-nin Qüvvələrin Ayrılması üzrə Müşahidə Missiyası (UNDOF) nəzarət edir.
SANA-nın məlumatına görə, son dövrdə İsrail ordusu Suriya ərazilərinə dəfələrlə müdaxilə edib və hava zərbələri həyata keçirib. Hücumlar nəticəsində mülki şəxslərin öldüyü, həmçinin Suriya ordusuna məxsus hərbi obyektlər, texnika, silah və sursatların məhv edildiyi bildirilir.
13:17 21.09.2026
Oxunuş sayı: 49
