Almaniyanın sürətli silahlanması Avropada narahatlıq yaradır
Almaniyanın sürətli şəkildə yenidən silahlanması Avropanın bir sıra ölkələrində narahatlıqların artmasına səbəb olur.
Crossmedia.az xəbər verir ki, “Wall Street Journal” bu barədə məlumat yayıb.
Nəşrin yazdığına görə, Almaniyada “Almaniya üçün Alternativ” (“AfD”) partiyasının mövqelərinin güclənməsi fonunda Avropada gərginlik artır. Partiya ictimai rəy sorğularında liderlik edir.
“Wall Street Journal” bəzi avropalı rəsmilərin Almaniyanın hərbi imkanlarını artırmasının qitədə güc balansını dəyişə biləcəyindən narahat olduğunu yazıb.
Nəşrin məlumatına görə, bəzi rəsmilər hətta “AfD” hakimiyyətdə olmasa belə, yenidən silahlanmış Almaniya ilə Rusiyanın Avropanın iki ən böyük gücünə çevrilə biləcəyindən ehtiyat edirlər. Onların fikrincə, Berlin gələcəkdə qarşıdurmadan yayınmaq üçün Kremlə güzəştlər edə bilər.
Qəzet həmçinin Almaniyanın hərbi satınalmalarının əsasən ölkənin yerli silah istehsalçılarına fayda verməsi ilə bağlı Avropada narahatlığın artdığını qeyd edib.
Alman rəsmiləri isə qonşu ölkələrin narahatlıqlarını başa düşdüklərini bildirirlər. Bununla belə, bu narahatlıqların indiyədək hərbi siyasətdə hər hansı dəyişikliyə səbəb olmadığı vurğulanır.
12:07 20.09.2026
Oxunuş sayı: 45
