“Mobi Dik”in 175 illiyində ABŞ-nin qədim balina sənəti yenidən gündəm oldu
Herman Melvillin məşhur “Mobi Dik” romanının 175 illiyi ərəfəsində ABŞ-də balina ovu ilə bağlı ən qədim sənət növlərindən biri olan skrimşou ənənəsi yenidən diqqət mərkəzinə gəlib.
Crossmedia.az xəbər verir ki, BBC bu barədə məlumat yayıb.
Skrimşou balina dişləri və sümükləri üzərində müxtəlif təsvirlərin həkk edilməsi sənətidir və ABŞ-nin ən qədim yerli sənət formalarından biri hesab olunur. Bu sənət növü balina ovçuluğunun mədəni irsinə və keçmişdə bu sahə ilə məşğul olan insanların həyatına yaxından nəzər salmağa imkan verir.
ABŞ-nin Massaçusets ştatının Nyu-Bedford şəhərində yaşayan rəssam Jade Gotauco da bu ənənəni davam etdirən sənətçilərdəndir. O, uşaqlığını balina sümükləri arasında keçirib. Atası Çet Gotauco skrimşou sənətçisi olub və ovlanmış balinaların dişləri üzərində müxtəlif təsvirlər həkk edib.
Hazırda Jade Gotauco özü balina dişləri üzərində dəniz mənzərələri yaradır. Onun əsərlərində okeanda mübarizə aparan kaşalotlar və kiçik qayıqlardan balinalara nizə atan ovçular təsvir olunur.
Balina ovçuluğunun ABŞ-dəki mədəni irsi barədə danışarkən çoxları Herman Melvillin 1851-ci ildə nəşr olunan “Mobi Dik” əsərini xatırlayır. Bununla yanaşı, skrimşou ənənəsi həmin sənayenin tarixini daha yaxından əks etdirən mühüm sənət nümunələrindən biri kimi qiymətləndirilir.
01:32 20.09.2026
Oxunuş sayı: 54
