ADMİU-nun tələbəsi hansı əsaslarla universitetdən xaric edildi? - hüquqşünas açıqladı
Azərbaycan Dövlət Mədəniyyət və İncəsənət Universitetinin tələbəsi Kənan Zindadil sosial şəbəkədə yayılan video ilə bağlı universitetdən xaric edilib. ADMİU-nun açıqlamasına görə, Kənan Zindadil Teatr sənəti fakültəsinin “Musiqili teatr aktyoru” ixtisası üzrə II tədris ilinin tələbəsi olub.
Universitetin məlumatına əsasən, “TikTok”da yayılan videoda birinci kurs tələbələri barədə aşağılayıcı ifadələr işlədilib və onlara qarşı hədə-qorxu səsləndirilib. Məsələ ilə bağlı İntizam Komissiyasının iclası keçirilib və universitetdaxili nizam-intizam qaydalarının müvafiq bəndləri əsas götürülərək Kənan Zindadilin xaric edilməsi barədə qərar qəbul olunub. Qərar rektorun əmri ilə rəsmiləşdirilərək qüvvəyə minib.
Crossmedia.az-a açıqlamasında hüquqşünas Anar Ramazanov tələbənin universitetdən xaric edilməsinin konkret hallarla bağlı olduğunu bildirib;
“Ümumilikdə götürəndə, “Təhsil haqqında” 2009-cu il tarixli qanunda təhsil müəssisəsindən tələbənin xaric edilməsinin konkret əsasları sadalanmır. Bunun hüquqi əsasını həmin qanunun 29-cu maddəsi Elm və Təhsil Nazirliyinin üzərinə həvalə edir. 32-ci maddə isə yalnız ümumi qaydada müəssisənin nizamnaməsinə və ya daxili qaydalarına riayət vəzifəsini müəyyən edir. Konkret xaric edilmə əsasları isə Elm və Təhsil Nazirliyi Kollegiyasının 25 fevral 2024-cü il tarixli qərarı ilə təsdiqlənmiş müvafiq qaydalarla tənzimlənir”, - deyə hüquqşünas qeyd edib.
Anar Ramazanov həmin qaydalarda tələbənin ali təhsil müəssisəsindən xaric edilməsinin əsaslarından birinin daxili intizam qaydalarının pozulması ilə bağlı olduğunu vurğulayıb: “Həmin qaydaların 3.1-ci bəndində tələbənin ali təhsil müəssisəsindən xaric edilməsinin 8 halı müəyyənləşdirilib. Həmin hallardan biri, yəni 3.1.3-cü bənd tələbənin müəssisənin daxili intizam qaydalarını kobud şəkildə pozması və ya dəfələrlə pozması kimi göstərilib”.
Hüquqşünas bildirib ki, konkret vəziyyətə hüquqi qiymət vermək üçün universitetin daxili intizam qaydaları və tələbə ilə bağlanmış müqavilə də araşdırılmalıdır.
“Hazırkı halda, araşdırılan məsələdə tələbə ilə ali təhsil müəssisəsi arasında bağlanmış müqavilənin tələblərinə, eyni zamanda ali təhsil müəssisəsinin daxili intizam qaydalarına baxmaq zəruridir. Normativ səviyyədə Elm və Təhsil Nazirliyinin müvafiq Kollegiya qərarı tələbənin müəssisənin daxili intizam qaydalarını kobud şəkildə və ya dəfələrlə pozması halında ali təhsil müəssisəsindən xaric olmasının hüquqi əsaslarını müəyyən edir. Lakin bu tələb hər bir təhsil müəssisəsinin daxili intizam qaydasında və ya tələbə ilə bağlanmış müqavilədə xüsusilə tənzimlənə bilər”, - deyə Anar Ramazanov bildirib.
O əlavə edib ki, bu səbəbdən konkret tələbənin universitetdən xaric edilməsinin tam qanunsuz olduğunu yalnız mövcud məlumatlar əsasında demək mümkün deyil: “Daha detallı hüquqi qiymət vermək üçün müəssisənin daxili intizam qaydalarına baxmaq, eyni zamanda, əgər varsa, tələbə ilə universitet arasında bağlanmış müqavilənin şərtlərini araşdırmaq lazımdır. Ola bilər ki, dediyim bu sənədlərdə bir qədər fərqli müddəalar və tələblər nəzərdə tutulsun”.
Nigar Xəlilli
14:15 18.09.2026
Oxunuş sayı: 55
