Vüqar Rəhimzadə: Tarixi Zəfərimizi, suverenliyimizin bərpasını əbədiləşdirən şəhər günləri gələcəyə çağırışdır
44 günlük İkinci Qarabağ müharibəsində tarixi Zəfərimizdən ötən 6 il Azərbaycanın müasir tarixinə möhtəşəm, qürurverici səhifələrin yazılmasına şahidlik edib. Bu gün Azərbaycanda 20 sentyabr tarixi dövlət başçısı İlham Əliyevin sərəncamları ilə həm Dövlət Suverenliyi Günü, həm də Xankəndi, Xocalı, Xocavənd və Ağdərə şəhərləri günü kimi qürurla qeyd edilir. Vətən müharibəsindəki Zəfərin davamı olaraq 2023-cü il sentyabrın 19-20-də rəşadətli ordumuzun Müzəffər Ali Baş Komandan İlham Əliyevin rəhbərliyi ilə həyata keçirdiyi birgünlük lokal xarakterli antiterror tədbirləri nəticəsində ölkəmiz dövlət suverenliyini tam bərpa etdi. Azərbaycan ərazisində qurulmuş separatçı rejimin fəaliyyətinə son qoyuldu. Ermənistan silahlı qüvvələrinin qalıqları və qeyri-qanuni silahlı dəstələri tərksilah edilərək ərazilərimizdən çıxarıldı, respublikamızın suverenliyi tam təmin edildi, bütün ölkə ərazisində Konstitusiya quruluşu bərpa olundu. Azərbaycan Prezidenti, Silahlı Qüvvələrin Ali Baş Komandanı İlham Əliyev 2023-cü il oktyabrın 15-də Xankəndi, Xocalı, Xocavənd və Ağdərə şəhərlərində qalibiyyət rəmzi olan üçrəngli Bayrağımızı ucaltdı. Dövlət başçısı İlham Əliyev Xankəndi şəhərində Azərbaycan Bayrağını ucaltdıqdan sonra xalqa müraciətində bu çağırışı etdi: “Əziz həmvətənlər, bu meydanda bu gün durmaq böyük xoşbəxtlikdir, böyük fərəhdir, qürur mənbəyidir. Mən qürur hissi ilə Azərbaycan Bayrağını bu gün qaldırmışam və doğma xalqıma bir daha demək istəyirəm ki, biz bu Qələbəyə layiqik. Azərbaycan xalqı bu Qələbəni öz qanı, canı bahasına əldə etmişdir. Bu gün burada qaldırdığım Bayraq burada əbədi dalğalanacaq və biz burada əbədi yaşayacağıq. Qarabağ bizimdir, Qarabağ Azərbaycandır!”
Bu fikirləri Milli Məclisin deputatı Vüqar Rəhimzadə Crossmedia.az-a açıqlamasında bildirib.
Milli Məclisin deputatı qeyd edib ki, işğaldan azad edilmiş digər ərazilərimiz kimi, Xankəndinin, Xocalının, Xocavəndin və Ağdərənin həyatında yeni mərhələ başladı. Prezident İlham Əliyevin suverenliyimizin tam bərpasından ötən üç ildə Xankəndiyə 16, Xocavəndə 12, Xocalıya 13, Ağdərəyə 4 səfəri bu torpaqlarda görülən işlərin aydın mənzərəsini yaradır. Bircə faktı qeyd etmək kifayətdir ki, keçmiş məcburi köçkünlərin qayıtdıqları 10 şəhər sırasında Xankəndinin, Xocalının və Xocavəndin də adları var. 2023-cü il noyabr ayının 8-də Xankəndi şəhərində Vətən müharibəsində əldə edilən Zəfərin üçüncü ildönümünə həsr olunan hərbi parad keçirildi. Müzəffər Ali Baş Komandan İlham Əliyev paraddakı çıxışında bildirdi ki, bu günü bizə bəxş edən müzəffər Silahlı Qüvvələrimiz döyüş meydanında cəsarət, qəhrəmanlıq, fədakarlıq göstərərək düşməni bizim əzəli torpaqlarımızdan qovmuşdur. Bu, böyük tarixi hadisədir. Azərbaycan xalqının çoxəsrlik tarixində buna bənzər parlaq Qələbə olmamışdır. Şuşa əməliyyatı, 44 gün ərzində apardığımız bütün digər hərbi əməliyyatlar, hərbçilərimizin şücaəti bir qəhrəmanlıq dastanıdır. Qırx dörd gün ərzində döyüş meydanında düşməni məğlub edərək, şəhər və kəndlərimizi azad edərək Azərbaycan əsgər və zabiti əsl qəhrəmanlıq göstərmişdir. Hər gün biz irəli gedirdik, bir gün belə geriyə addım atmamışdıq. Düşmən ordusu Azərbaycan Ordusunun, Silahlı Qüvvələrin peşəkarlığını, fədakarlığını görərək daha da böyük təşvişə düşürdü və onların özlərinin etirafına görə, 44 günlük müharibə zamanı Ermənistan ordusunda 12 min fərari olmuşdur. Azərbaycan Silahlı Qüvvələrinin bir nəfər də olsun hərbçisi döyüş meydanını tərk etməmişdir. Bu, Azərbaycan xalqının əyilməz ruhunu və yüksək mənəvi keyfiyyətlərini bir daha bütün dünyaya nümayiş etdirdi.
Dövlət başçısı İlham Əliyevin hər bir çıxışı şanlı Qələbəmizin yaratdığı reallıqlar əsasında Azərbaycanın növbəti zəfərlərə doğru inamlı addımlarının, hər bir hədəfə ardıcıllıqla nail olmasının təqdimatıdır. Keçirilən hərbi paradların hər biri Azərbaycan Ordusunun gücünün, qüdrətinin, döyüş ruhunun təqdimatı olsa da, tarixi Zəfərimizdən sonrakı dövrdə keçirilən paradların bir özünəməxsusluğu, fərqliliyi vardır. Prezident İlham Əliyevin tarixi Zəfərimizin dünyaya təqdimatında əhəmiyyətli rol oynayan 10 dekabr 2020-ci il tarixində keçirilən Zəfər paradında qeyd etdiyi kimi, Azadlıq meydanında paradlar çox keçirilib. Ancaq bu paradın xüsusi önəmi var. Bu, Zəfər paradıdır. Bu, tarixi hadisədir.
Vüqar Rəhimzadə vurğulayıb ki, suverenliyimizin tam bərpasından sonra sakinlərinə qovuşan ilk şəhər Xocalı şəhəri oldu. Dövlət başçısı İlham Əliyev, birinci xanım Mehriban Əliyeva və qızları Arzu Əliyeva 28 may 2024-cü il tarixində Xocalı şəhərinə köçən sakinlərlə görüşdülər. Görüşdə “Bu gün, əslində, Böyük Qayıdış Proqramının Xocalı səhifəsi yazılır. Yaxın gələcəkdə digər xocalılılar da buraya qayıdacaqlar, əminəm ki, böyük həvəslə” söyləyən Prezident İlham Əliyev onu da əlavə etdi ki, bu gün bax, burada – Xocalıda, - cəmi 8 ay ərzində bərpa edilmiş Xocalıda, - görüşməyimiz əlbəttə ki, xüsusi məna daşıyır: “Məhz Müstəqillik Günündə mən sizinlə yenidən görüşmək istəmişəm. Üç ay bundan əvvəl - fevralın 26-da hər birimiz üçün faciəli gündə Xocalıda Memorial Kompleksin təməlini qoyduq. Bu gün isə artıq xocalılılar qayıdır və şəhər də göz oxşayır”.
Son üç ildə Xocalıda, Xankəndidə, Xocavənddə və Ağdərədə aparılan bərpa-quruculuq işlərinin miqyası ölçüyəgəlməzdir. Müzəffər Ali Baş Komandan İlham Əliyevin bu torpaqlara hər bir səfəri mühüm sosial obyektlərin açılışı və təməlqoyma mərasimlərinin keçirilməsi, görülən işlərlə tanışlıqla yadda qalır. Hər zaman qeyd etdiyimiz kimi, artıq Qarabağımız və Şərqi Zəngəzurumuz diplomatik mərkəz kimi dünyanın diqqətindədir. Bu bölgələrdə müxtəlif mövzularda keçirilən beynəlxalq əhəmiyyətli tədbirlərin bir məqsədi var-Zəfərimizin, suverenliyimizin bərpasının yaratdığı reallıqları təqdim və təsdiq etmək. Bu məkanlardan Qarabağın və Şərqi Zəngəzurun malik olduğu imkanlar dünyaya təqdim edilir. Həmçinin Azərbaycanın bu torpaqlarımızdan dünyaya sülh, əməkdaşlıq çağırışlarının edilməsi hər birimizdə böyük qürur hissi keçirir. Azərbaycanın azad edilmiş ərazilərdə apardığı bərpa-quruculuq işləri ölkəmizin müasir şəhərsalma təcrübəsinin təqdimatında öz sözünü deyir. Bu baxımdan Azərbaycan Milli Şəhərsalma forumları xüsusi əhəmiyyət daşıyır ki, onlardan birinə Xankəndi şəhəri ev sahibliyi edib. Digər ikisi isə Ağdam və Zəngilan şəhərlərində keçirilib. Ötən il Xankəndi şəhərində Üçüncü Azərbaycan Milli Şəhərsalma Forumu ilə yanaşı, İqtisadi Əməkdaşlıq Təşkilatının 17-ci Zirvə görüşü, həmçinin III Şuşa Qlobal Media Forumu da keçirilmişdir.
Millət vəkili bildirib ki, işğaldan azad edilmiş ərazilərin iqtisadi potensialı, aparılan bərpa-quruculuq işləri, eləcə də əmək bazarının tələbləri regionda yüksəkixtisaslı kadrların hazırlığını həyata keçirən ali təhsil müəssisəsinin təşkili zərurətini meydana çıxarmışdı. Bu məqsədlə Prezident İlham Əliyevin 2023-cü il 28 noyabr tarixli Sərəncamı ilə Xankəndi şəhərində yerləşən ali təhsil müəssisəsinin əsasında Azərbaycan Respublikası Elm və Təhsil Nazirliyinin tabeliyində “Qarabağ Universiteti” publik hüquqi şəxs yaradıldı. 2024-cü ilin 20 sentyabr tarixində Qarabağ Universitetinin təmirdən sonra açılışı oldu.
Vüqar Rəhimzadə qeyd edib ki, azad edilmiş ərazilərimizdə görülən işləri sadalamaqla bitməz. Zəfərimizin, suverenliyimizin bərpasının əbədiləşdirilməsinə xidmət edən şəhər günlərinin təsis edilməsi əslində bir hesabat xarakteri daşıyır. Hər bir şəhər günündə keçilən yola nəzər salınır, bu gün tarixi sahibinə qayıdan torpaqlarımızın 30 illik işğal dövründə yaşadığı faciələr xüsusilə indiki və gələcək nəsillərə çatdırılır. Bunları unutmağa haqqımız yoxdur. Dövlət başçısı İlham Əliyevin çağırışlarında qeyd olunduğu kimi, xalqımıza qarşı törədilən vəhşilikləri heç vaxt unutmayacağıq. Xocalı qurbanlarını unutmayacağıq, dağıdılmış məscidlərimizi, təhqir edilmiş mədəni ocaqlarımızı heç vaxt unutmayacağıq və bu yaddaş bizi daha da ayıq edəcək. Bu yaddaş imkan verməyəcək ki, biz yenə də şirin sözlərə aldanaq, imkan verməyəcəyik ki, yenə də xalqımıza qarşı hansısa məkrli planlar baş tutsun. Biz ayıq olmalıyıq, ayığıq və eyni zamanda, öz hərbi gücümüzü də artırırıq.
Millət vəkili bildirib ki, artıq Qarabağımızda və Şərqi Zəngəzurumuzda yeni həyat başlayıb. Bu torpaqlara hər gün mərhələ-mərhələ soydaşlarımızın qayıdışına şahidlik etməkdən böyük qürur hissi keçiririk. Bu gün 48 şəhər və kənddə 90 mindən çox insan yaşayır, işləyir, təhsil alır. Bu statistika Xankəndi, Xocalı, Xocavənd və Ağdərə rayonlarının şəhər və kəndlərinə qayıdış göstəricilərində də yüksəkdir. Cari ilin 17 avqust tarixinədək Xankəndi şəhərinə 76 ailə, 332 nəfər, Xocalı şəhərinə 144 ailə, 651 nəfər, Xocavənd şəhərinə isə 413 ailə, 1.614 nəfər qayıdıb. Bu rəqəmlər hər gün yenilənir. Bu, Böyük Qayıdış Proqramının uğurlu icrasının əsas göstəricilərindəndir.
16:12 18.09.2026
Oxunuş sayı: 54
