AMEA prezidenti İsa Həbibbəyli Çin Sosial Elmlər Akademiyasının nümayəndə heyəti ilə görüşüb
AMEA-nın prezidenti akademik İsa Həbibbəyli ölkəmizdə səfərdə olan Çin Sosial Elmlər Akademiyasının nümayəndə heyəti ilə görüşüb.
Crossmedia.az-a AMEA-nın Rəyasət Heyətində keçirilən görüşdə çıxış edən akademik İsa Həbibbəyli son illərdə Azərbaycanla Çin arasında əməkdaşlıq əlaqələrinin strateji tərəfdaşlıq səviyyəsinə yüksəldiyini, bütün sahələrdə olduğu kimi, elm istiqamətində də münasibətlərin sürətlə inkişaf etdiyini söyləyib. Akademik İsa Həbibbəyli qeyd edib ki, Azərbaycan Milli Elmlər Akademiyasının Rəyasət Heyəti, həmçinin Akademiyanın elmi-tədqiqat müəssisələri Çinin bir sıra elmi qurumları və ali təhsil müəssisələri ilə sıx əməkdaşlıq edir.
AMEA rəhbəri diqqətə çatdırıb ki, Çin Sosial Elmlər Akademiyası ilə 2012-ci ildə imzalanmış əməkdaşlıq haqqında memorandumun bəndləri artıq icra olunub və qurumlarımız arasında ikili əlaqələrimizdə yeni istiqamətlər meydana çıxıb. Akademik İsa Həbibbəyli bildirib ki, AMEA ilə Çin Sosial Elmlər Akademiyası arasında əməkdaşlıq memorandumunun müasir dövrün çağırışları əsasında yenilənməsi zərurəti meydana çıxıb. AMEA-nın Nizami Gəncəvi adına Ədəbiyyat İnstitutunda Çin Tədqiqatları Mərkəzinin fəaliyyət göstərdiyini, “Azərbaycan ədəbiyyatında Çin mənşəli arxetip və obrazlar” mövzusunda dissertasiya işi müdafiə edildiyini deyən akademik İsa Həbibbəyli vurğulayıb ki, bu gün Ədəbiyyat İnstitutunda Çin şair və yazıçılarının sovet dövründən indiyədək Azərbaycan haqqında yazdıqları əsərləri toplanılıb və artıq çap ərəfəsindədir.
Görüşdə çıxış edən Çin Sosial Elmlər Akademiyasının Rusiya, Şərqi Avropa və Mərkəzi Asiya Araşdırmaları İnstitutunun Şanxay Əməkdaşlıq Təşkilatı üzrə Tədqiqat Mərkəzinin baş katibinin müavini Yang Jin də Azərbaycan-Çin əməkdaşlığının sürətlə inkişaf etdiyini diqqətə çatdırıb, elm sahəsində birgə əməkdaşlıq üzrə mühüm elmi nəticələrin əldə olunduğunu deyib. O, 2012-ci ildə ilk dəfə Azərbaycana gəldiyini, həmin vaxtdan indiyədək xeyli inkişafın şahidi olduğunu vurğulayaraq ölkəmizlə bağlı geniş həcmli kitab yazdığını diqqətə çatdırıb, burada elmi əlaqələrə də yer verdiyini deyib. Yang Jin AMEA-nın prezidenti akademik İsa Həbibbəylinin təkliflərini Çin Sosial Elmlər Akademiyasının prezidentinə çatdıracağını bildirib.
Görüş zamanı ikitərəfli elmi əməkdaşlıq məsələləri üzrə fikir mübadiləsi aparılıb.
Sonda qarşılıqlı olaraq kitab və xatirə hədiyyələri təqdim edilib.
Görüşdə Çin Sosial Elmlər Akademiyasının Universitetinin magistrantları Zhou Luping və Lin Hexi də iştirak ediblər.
17:01 18.09.2026
Oxunuş sayı: 44
