Ermənistan Rusiyanın tətbiq etdiyi məhdudiyyətlərdən Aİİ-yə şikayət edib
Ermənistan Rusiyanın erməni məhsullarının idxalına tətbiq etdiyi məhdudiyyətlərlə bağlı Avrasiya İqtisadi İttifaqına (Aİİ) şikayət edib.
Crossmedia.az xəbər verir ki, Ermənistanın İqtisadiyyat nazirinin müavini Tiqran Qasparyan bu barədə jurnalistlərə açıqlama verib.
Qasparyan bildirib ki, Ermənistan məsələni yalnız Rusiya ilə ikitərəfli əlaqələr çərçivəsində deyil, Aİİ-nin mövcud mexanizmləri vasitəsilə də həll etməyə çalışır. Onun sözlərinə görə, ittifaq çərçivəsində ticarət maneələrinin aradan qaldırılması üçün konkret mexanizmlər mövcuddur və Ermənistan artıq bu imkanlardan istifadə edir.
Ermənistan rəsmisi ölkəsinin şikayət verdiyini və Aİİ mexanizmlərinin işə düşərək tətbiq olunan məhdudiyyətlərin aradan qaldırılacağına ümid etdiyini bildirib.
Qasparyanın sözlərinə görə, Ermənistan hökuməti Rusiyanın tətbiq etdiyi məhdudiyyətlərin Aİİ çərçivəsində qəbul edilmiş razılaşma və prinsiplərə uyğun olmadığını hesab edir.
“Biz Aİİ-nin öz prinsiplərinə uyğun fəaliyyət göstərməsi üçün mübarizə aparırıq”, – deyə nazir müavini bildirib.
Məlumata görə, Rusiyanın baytarlıq və fitosanitar nəzarət qurumu olan Rosselxoznadzor bu il Ermənistandan Rusiyaya bir sıra kənd təsərrüfatı və digər məhsulların idxalına müxtəlif tarixlərdə məhdudiyyətlər tətbiq edib. Məhdudiyyətlər arasında çiçəklər, pomidor, xiyar, bibər, göyərti, çiyələk, müxtəlif meyvələr, üzüm, badımcan, kartof, quru meyvələr, canlı balıq və balıq məhsulları, eləcə də süd məhsulları yer alıb.
Ermənistan tərəfi hesab edir ki, bu məhdudiyyətlər Aİİ-nin prinsiplərinə və üzv ölkələr arasında qüvvədə olan razılaşmalara uyğunlaşdırılmalıdır.
17:54 08.09.2026
Oxunuş sayı: 43
