Honq Konq Mərkəzi Asiya şirkətlərini birjaya cəlb edir
Honq Konq Mərkəzi Asiyanın dövlətə məxsus infrastruktur şirkətlərinin səhmlərini yerli birjada yerləşdirməyə hazırlaşır.
Crossmedia.az xəbər verir ki, Bloomberg bu barədə məlumat yayıb.
Honq Konqun maliyyə katibi Pol Çanın sözlərinə görə, bir sıra Mərkəzi Asiya dövlət şirkətləri Honq Konq birjasında ilkin kütləvi təklif keçirməyi planlaşdırır. Lakin o, şirkətlərin adlarını və mümkün IPO tarixlərini açıqlamayıb.
Məlumata görə, Honq Konq bu addımla Mərkəzi Asiya ölkələri ilə iqtisadi əlaqələri genişləndirməyi və regiondan kapital cəlb etməklə maliyyə bazarını şaxələndirməyi hədəfləyir. Bu proses Çin və Mərkəzi Asiya arasında ticarət, nəqliyyat və infrastruktur layihələri üzrə maliyyə əlaqələrinin də güclənməsinə imkan yarada bilər.
Artıq bu istiqamətdə konkret addımlar da atılıb. Qazaxıstanın dövlətə məxsus dəmir yolu operatoru Kazakhstan Temir Zholy (KTZ) iyunun 30-da Honq Konq birjasında IPO üçün müraciət edib. Şirkət cəlb olunacaq vəsaitin bir hissəsini Qazaxıstanla Çin arasında sərhədyanı dəmir yolu bağlantısının inkişafına yönəltməyi planlaşdırır.
Honq Konq birjasında hazırda “Bir kəmər, bir yol” təşəbbüsünə daxil olan ölkələrdən 100-dən çox şirkət təmsil olunur. Pol Çanın açıqlamasına görə, həmin şirkətlərin ümumi bazar kapitallaşması 340 milyard Honq Konq dollarından, yəni təxminən 43,4 milyard ABŞ dollarından çoxdur.
Honq Konq və Mərkəzi Asiya arasında maliyyə əlaqələrinin genişləndirilməsi istiqamətində digər addımlar da atılır. İyun ayında Honq Konq Birjalar və Klirinq Şirkəti (HKEX) Qazaxıstanın Astana Beynəlxalq Birjası və AIFC Authority ilə əməkdaşlığın genişləndirilməsinə dair memorandumlar imzalayıb. Sənədlər qarşılıqlı listinqlərin və borc qiymətli kağızlarının sərhədlərarası yerləşdirilməsinin inkişafını nəzərdə tutur.
Beləliklə, Honq Konq Mərkəzi Asiya şirkətləri üçün yeni maliyyələşmə və beynəlxalq kapitala çıxış platformasına çevrilməyə çalışır.
12:05 07.09.2026
Oxunuş sayı: 35
