Yeni müharibə başlayır - bu Rusiya NATO müharibəsi deməkdir
Almaniya ilə Rusiya arasında münasibətlərdə gərginlik davam edir. Alman siyasətçilərin Rusiya ilə birbaşa hərbi qarşıdurma ehtimalı ilə bağlı xəbərdarlıqları Avropada müharibə riskini yenidən gündəmə gətirib. Xüsusilə Almaniyanın Ukrayna müharibəsində rolunun artması fonunda Berlin-Moskva münasibətlərinin hansı istiqamətdə inkişaf edəcəyi diqqət çəkir.
Mövzu ilə bağlı politoloq Zeynal Əmrəliyev Crossmedia.az-a açıqlamasında bildirib ki, Almaniya ilə Rusiya arasında birbaşa hərbi qarşıdurma ehtimalı aşağıdır:
“Hər iki dövlət ehtiyatlı davranar və birbaşa müharibəyə getməz. Nəzərə alaq ki, bu, Rusiya-NATO savaşı deməkdir. Bu da konkret şəkildə dünya müharibəsinə apara bilər. Yəni Şərq və Qərb blokları arasında toqquşmanın baş verməsinə gətirib çıxara bilər. Qərb blokunun önəmli üzvü kimi Almaniya, sözsüz ki, belə bir müharibədən yayınacaq və Rusiyaya qarşı real hərbi addımlar atmayacaq. Tərəflər arasında müxtəlif anlaşılmazlıqlar baş verə bilər. Lakin bunun birbaşa hərbi qarşıdurmaya çevrilməsi ehtimalı azdır”.
Politoloq qeyd edib ki, Avropa ölkələri Rusiyaya qarşı müxtəlif siyasi, iqtisadi və təhlükəsizlik tədbirləri həyata keçirirlər:
“Avropa ölkələri Rusiyaya qarşı müəyyən addımlar atırlar. Rusiyadan gələn şəxslərə qarşı viza rejiminin sərtləşdirilməsi, eyni zamanda Rusiyaya texnoloji embarqoların tətbiq edilməsi məsələləri aktualdır. Bununla yanaşı, Avropa ölkələri öz təhlükəsizliklərini gücləndirmək üçün mühüm hərbi və təhlükəsizlik tədbirləri həyata keçirirlər. Bütün bunlar göstərir ki, Avropa öz təhlükəsizliyini qorumaq üçün real addımlar atır. Almaniya da bu baxımdan istisna deyil. Müxtəlif ölkələrin, təkcə Almaniyanın deyil, zaman-zaman bu cür açıqlamalarının şahidi oluruq. Məsələn, Şərqi Avropa ölkələrindən, o cümlədən Polşanın siyasətçiləri tez-tez Rusiya ilə müharibə ehtimalı barədə xəbərdarlıqlar edirlər. İngiltərədə də bununla bağlı, hətta hökumət səviyyəsində açıq siqnallar verilir. Fransada da Rusiya ilə mümkün toqquşma ehtimalına uyğun müəyyən hazırlıqlar görülür. Yəni bu proses təkcə Almaniya ilə məhdudlaşmır, müxtəlif Avropa ölkələrində də müşahidə olunur”.
Z.Əmrəliyev vurğulayıb ki, yaxın gələcəkdə Rusiya ilə Avropa arasında genişmiqyaslı hərbi toqquşmanın baş verməsi real görünmür:
“Düşünürəm ki, yaxın gələcəkdə belə bir ehtimalın reallaşması gözlənilmir. Çünki Avropanın Rusiya ilə toqquşması çox böyükmiqyaslı qarşıdurma deməkdir. Ukraynada ciddi şəkildə itkilər verən Rusiyanın bütün Avropa ölkələrini və NATO-nu qarşısına alması inandırıcı deyil”.
Nuray Mehtiyeva
19:00 04.09.2026
Oxunuş sayı: 45
