Kiyevdə hava limanı vuruldu? Yanğınla bağlı yeni detallar
c
Hücumun hədəfi tərəflərdən heç biri tərəfindən rəsmi açıqlanmayıb. Ukrayna Ali Radasının deputatı Aleksey Qonçarenko zərbənin uzun müddətdir uçuş həyata keçirməyən iki köhnə Yak-40 sərnişin təyyarəsinə endirilmiş ola biləcəyini bildirib.
“Shot” Telegram kanalı isə hücumun hədəfinin hərbi təyyarə olduğunu iddia edib. Məlumata görə, aerodromda An-24 və An-26 təyyarələri yerləşir. An-26 həmçinin hərbi-nəqliyyat təyyarəsi kimi şəxsi heyətin, texnika və yüklərin daşınmasında istifadə olunur.
Julyanı Kiyevin beynəlxalq mülki hava limanıdır. 2022-ci ilin fevralından Ukrayna hava məkanının bağlanması səbəbindən burada müntəzəm sərnişin reysləri həyata keçirilmir. Hazırda aerodrom hərbi aviasiyanın yerləşdirilməsi və xüsusi uçuşların qəbulu üçün istifadə olunur.
“Voennaya Xronika” Telegram kanalında isə zərbənin kim tərəfindən həyata keçirildiyinin hələ də dəqiq məlum olmadığı bildirilib. Kanal Ukrayna tərəfinin səhvən öz obyektlərini vurması ehtimalını da irəli sürüb.
Ukrayna deputatı Aleksey Qonçarenko ABŞ Prezidenti Donald Trampın xüsusi nümayəndəsi Stiven Uitkoff və Trampın kürəkəni Cared Kuşnerin sentyabrın 6-da Kiyevə səfər edəcəyini bildirib.
Onun sözlərinə görə, amerikalı nümayəndələrin əvvəlcə Moskvaya səfər etməsi, daha sonra isə Kiyevə getməsi planlaşdırılıb. Qonçarenko bildirib ki, nümayəndələrin Kiyevə hava yolu ilə deyil, quru nəqliyyatı ilə getməsi ehtimalı yüksəkdir.
Hadisə Ukrayna Prezidenti Volodimir Zelenskinin Rusiya hava məkanı ilə bağlı açıqlamasından sonra baş verib. Zelenski Rusiyanın səmasının “tamamilə təhlükəli” vəziyyətə gəldiyini və faktiki olaraq bağlanacağını bildirib.
Ukrayna lideri bu mesajın Kiyev və Moskvada fəaliyyət göstərən xarici ölkə səfirlərinə, eləcə də beynəlxalq aviaşirkətlərin nümayəndələrinə çatdırılmasının vacibliyini vurğulayıb.
14:43 04.09.2026
Oxunuş sayı: 47
