Suriyadakı druz liderindən Sveyda ilə bağlı İDDİA: İsrailə yaxınlaşma çağırışı
Suriyadakı druzların dini liderlərindən Hikmət əl-Hicri Sveyda əyalətinin Suriyadan ayrılaraq müstəqil olması və İsraillə yaxınlaşması çağırışı edib.
Crossmedia.az xəbər verir ki, Hikmət əl-Hicri bu barədə açıqlama verib.
Əl-Hicri druz icmasının dini baxımdan ortaq dəyərlərə əsaslandığını bildirərək onu “İsrail Dövlətinin ayrılmaz hissəsi” adlandırıb. O, həmçinin İsrailin dövlət quruculuğu modelinə müsbət münasibət ifadə edib.
Dini lider uzun müddətdir Suriyanın cənubundakı Sveyda əyalətinin tam müstəqilliyini tələb edir. Bununla yanaşı, o, xarici təhlükəsizlik zəmanətlərinin təmin edilməsi şərti ilə əyalətin özünüidarəetmə modelinə keçməsini də mümkün variant kimi nəzərdən keçirir.
Əl-Hicri potensial təhlükəsizlik qarantı kimi dəfələrlə İsrailin adını çəkib.
O, həmçinin yaxın günlərdə Sveyda əyalətində müəyyən “hadisələrin” baş verə biləcəyinə işarə edib. Lakin dini lider bunun nə ilə bağlı olduğunu və mümkün hadisələrin xarakterini açıqlamayıb.
Qeyd olunur ki, Hikmət əl-Hicri Sveyda bölgəsində druzların tanıdığı üç dini liderdən biridir. Lakin onun mövqeyi icma daxilində birmənalı qarşılanmır. Digər iki dini liderin daha mülayim mövqe tutduğu bildirilir.
Suriyadakı druz əhalisinin sayının təxminən 700 min nəfər olduğu qiymətləndirilir. Onların əsas hissəsi Sveyda əyalətində yaşayır. Bölgənin isə hələ də böyük ölçüdə Dəməşqin effektiv nəzarətindən kənarda qaldığı bildirilir.
14:30 26.08.2026
Oxunuş sayı: 45
