UNESCO-nun iki mirası yox olmaq riski ilə üz-üzədir
Latın Amerikasında yerləşən iki məşhur UNESCO Dünya İrsi abidəsi insan fəaliyyəti və iqlim dəyişikliklərinin yaratdığı ciddi təhlükələrlə üzləşib.
Crossmedia.az xarici mediaya istinadən xəbər verir.
Peruda yerləşən qədim İnka qalası Maçu Pikçu hər il təxminən 1,8 milyon turist qəbul edir. Lakin ziyarətçilərin çoxluğu tarixi daş strukturların aşınmasına səbəb olur. Bundan əlavə, ekstremal hava hadisələri, buzlaqların əriməsi və tullantıların idarə olunması problemləri bölgəyə əlavə ziyan vurur.
Peru hakimiyyəti turist axınının məhdudlaşdırılması və ətraf mühitin qorunması məqsədilə dörd illik plan hazırlayıb. Plana əsasən, gündəlik ziyarətçi sayının 5 600 nəfərlə məhdudlaşdırılması və tullantıların emal sisteminin yaxşılaşdırılması nəzərdə tutulur.
Digər təhlükə ilə üzləşən ərazi isə Hondurasdakı Rio Platano Biosfer Qoruğudur. Mərkəzi Amerikanın ən böyük qorunan tropik meşəsi hesab olunan bu ərazi qanunsuz maldarlıq, ağac kəsimi, qızıl hasilatı və narkotik ticarəti səbəbindən ciddi zərər görür.
Meşələrin qırılması ekosistemləri, arxeoloji abidələri və yerli canlı növlərini məhv edir. Torpaqlarını qorumağa çalışan yerli icma liderlərinin isə zorakı təhdidlərlə üzləşdiyi bildirilir.
UNESCO nümayəndələrinin sözlərinə görə, bu əvəzolunmaz tarixi və təbii sərvətlərin qorunması üçün təcili beynəlxalq əməkdaşlıq, daha çox maliyyə dəstəyi və ciddi nəzarət tələb olunur.
06:00 20.08.2026
Oxunuş sayı: 60
