Zaxarova Yaponiyanın səfirinin Rusiya XİN-ə çağırılmasının səbəbini açıqladı
Yaponiyanın Rusiyadakı səfiri Akira Muto Tokionun Kiyevin mülki əhaliyə qarşı hərəkətlərini sistemli şəkildə dəstəkləməsi ilə bağlı Rusiya Xarici İşlər Nazirliyinə çağırılıb.
Crossmedia.az xəbər verir ki, “RİA Novosti” bu barədə məlumat yayıb.
Rusiya XİN-in rəsmi nümayəndəsi Mariya Zaxarovanın sözlərinə görə, görüş zamanı Yaponiya səfirinə ölkəsinin siyasətinə yenidən nəzər salması və Kiyevin mülki əhaliyə qarşı hərəkətlərinə verdiyi dəstəyi düşünməsi təklif olunub.
“Yaponiya səfirinə Smolensk meydanında xatırladıldı ki, əgər onlar öz baş nazirlərinin ifadəsi ilə desək, bu qədər ‘həssas’dırlarsa, bəlkə də sistemli şəkildə mülki əhaliyə qarşı terroru dəstəklədikləri barədə düşünərlər”, - deyə Zaxarova bildirib.
Diplomat həmçinin qeyd edib ki, Tokio rəsmi səviyyədə rusofob xarakterli bəyanatlara yol verir və Rusiya əleyhinə sanksiyalara qoşulub.
Zaxarovanın sözlərinə görə, bu sanksiyalar son nəticədə müxtəlif istiqamətləri əhatə edən genişmiqyaslı “sanksiya müharibəsinə” çevrilib.
Daha əvvəl Rusiya xarici işlər nazirinin müavini Mixail Qaluzin Vladimir Putinin İturup adasına səfərindən sonra Tokionun Rusiya əleyhinə bəyanatlarına görə Yaponiya səfirinə qəti etirazını bildirib.
14:45 18.08.2026
Oxunuş sayı: 48
