Payız meyvələrinin gizli təhlükəsi: Alarkən nələrə diqqət etməli?
Payız meyvələrinin mövsüm başlamamış bazarlarda satışa çıxarılması onların qida dəyəri və yetişmə şəraiti ilə bağlı sualları gündəmə gətirir. Əncir, üzüm, nar, xurma və heyva kimi meyvələr vitamin, mineral və antioksidantlarla zənginliyi ilə seçilir. Lakin erkən satışa çıxarılan məhsullarda seçim zamanı yetişmə dərəcəsi, saxlanma şəraiti və məhsulun keyfiyyəti də nəzərə alınmalıdır. Bəs payız meyvələrini alarkən hansı məqamlara diqqət etmək və onların faydalarından düzgün yararlanmaq lazımdır?
Crossmedia.az-a açıqlamasında qida eksperti Asim Vəliyev payızın əvvəlində satışa çıxarılan erkən mövsüm meyvələrinin seçilməsi və istehlakı zamanı bir sıra məqamlara diqqət yetirməyin vacib olduğunu bildirib. O, nar, xurma, heyva, naringi və alma kimi meyvələrin vitamin və mineral baxımından zəngin olduğunu qeyd edib.
“Payızın gəlişi ilə satışa çıxarılan erkən mövsüm meyvələrdən əsasən nar, xurma, heyva, naringi və alma vitamin və mineral baxımından çox zəngindir. Amma tam yetişmə periodunu keçmədiyi üçün onlarda təbii turşuluq yüksək, lif strukturu isə sərt ola bilir. Yaxşı olar ki, bu dövrdə orqanizmin immunitetini gücləndirmək üçün yerli və təbii şəraitdə dərilmiş meyvələrə üstünlük verilsin. Meyvənin təbii dad, ətir və qida dəyərini maksimum səviyyədə almaq üçün parlaq, kimyəvi yolla tezləşdirilmiş olmayan, mövsümünə uyğun şəkildə yetişən məhsulları seçmək yaxşı olardı”.
Asim Vəliyev erkən mövsümdə satılan meyvələrin xarici görünüşünün seçim zamanı istehlakçını yanıltmaması üçün diqqətli olmağı tövsiyə edib: “Erkən mövsümdə satılan meyvələrdə ən böyük risk onların süni yolla yetişdirilməsi və xarici görünüşünün aldadıcı olmasıdır. Seçim edərkən həddindən artıq iri, parıldayan və qabığında heç bir təbii qüsuru olmayan meyvələri seçmək yaxşı seçim deyil. Çünki təbii meyvənin özünəxas ətri və rəng paylanması var. Meyvəni kəsdikdə daxilində normadan artıq bərklik, ağ liflər, tam formalaşmamış toxumlar görürüksə, bu azot gübrələrinin normadan artıq istifadə edildiyinin əlamətidir”.
Ekspert mətbəxdə qida təhlükəsizliyinin təmin olunması üçün meyvələrin istehlakdan əvvəl düzgün təmizlənməsinin vacibliyini də vurğulayıb: “Erkən mövsüm meyvələrini alarkən kimyəvi qalıqları uzaqlaşdırmaq üçün onları axar su altında yaxşı yumaq, sirkəli suda saxladıqdan sonra istehlak etmək vacibdir. Meyvələri alarkən parlaqlıq verən mum təbəqəsinin, xarab, əzilmiş hissələrin olmamasına xüsusi diqqət etməliyik”.
Nigar Xəlilli
17:15 02.10.2026
Oxunuş sayı: 51
