Türkiyə Prezidenti Rəcəb Tayyib Ərdoğan Bakıda keçirilən COP29 iqlim sammitində bildirib ki, Türkiyə 2053-cü ilə qədər karbon neytrallığına nail olmağı hədəfləyir.
Crossmedia.az xarici KİV-ə əsasən xəbər verir ki, onun sözlərinə görə, ölkədə “sıfır emissiya” və ekoloji cəhətdən təmiz inkişaf məqsədinə nail olmaq üçün iqtisadiyyatın əsas sektorları transformasiya olunur.
Ərdoğan həmçinin bildirib ki, “sıfır emissiya” layihəsi artıq 5,9 milyon ton istixana qazının emissiyasının qarşısını alıb. 2024-2030-cu illər üçün milli enerji səmərəliliyi planının bir hissəsi olaraq Türkiyə emissiyalarını 100 milyon tona qədər azaltmağı planlaşdırır. Bundan əlavə, Türkiyə bərpa olunan enerji potensialını artırmağı planlaşdırır.
Qeyd edək ki, noyabrın 11-də BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub. Dünən isə Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Liderlər Sammitinin açılış mərasimi keçirilib.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunacaq.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
Gültac Mehdizadə
