Azərbaycan, Aİ və ABŞ güclərini birləşdirir: Minatəmizləmə əməliyyatlarının sürətlənməsi üçün unikal imkan
Azərbaycanın ABŞ-dəki səfiri Xəzər İbrahim "Axios"a müsahibəsində bildirib ki, Azərbaycan minalardan təmizləmə sahəsində ABŞ ilə əməkdaşlıqda maraqlıdır və problemin həlli üçün ABŞ texnologiyalarından istifadə etməyə ümid edir.
Onun sözlərinə görə, Azərbaycan adambaşına düşən göstəriciyə görə dünyanın ən çox minalarla çirklənmiş ölkələrindən biridir. X.İbrahim qeyd edib ki, müasir texnoloji nailiyyətlər minalardan təmizləmə prosesini sürətləndirməyə və səmərəliliyini artırmağa kömək edə bilər.
"Ümid edirik ki, bu məsələdə də ABŞ ilə əməkdaşlıq edə biləcəyik", - səfir deyib.
O vurğulayıb ki, minalardan təmizləmənin əsas aspektlərindən biri minaların yerinin dəqiq xəritələrinin olmasıdır. Bununla yanaşı, ərazilərin minalardan təmizlənməsi bahalı, uzunmüddətli və təhlükəli proses olaraq qalır.
"Əldə edilmiş razılaşmalar tez bir zamanda praktiki icra mərhələsinə keçir", - Xəzər İbrahim Ağ Evin hazırkı administrasiyası ilə səmərəli əməkdaşlıq barədə əlavə edib.
Milli Məclisin deputatı Nigar Məmmədova iki ölkə sözügedən sahədə əməkdaşlığın perspektivi barədə Crossmedia.az-a danışıb:
“Azərbaycan işğaldan azad edilmiş ərazilərdə minatəmizləmə prosesini öz imkanları hesabına aparır. Qarabağ və Şərqi Zəngəzurda həyata keçirilən genişmiqyaslı bərpa və yenidənqurma prosesinin qarşısında duran ən ciddi maneələrdən biri elə mina və partlamamış hərbi sursat problemidir. Təəssüf ki, son 2 həftə ərzində Ağdərə, Xocavənd və Kəlbəcərdə mina partlayışı hadisəsi baş verib. Nəticədə 6 nəfər xəsarət alıb.
Ümumiyyətlə, 2020-ci ilin noyabrından Ermənistanın ərazilərimizi mina ilə çirkləndirməsi nəticəsində 400-dən çox insan zərər çəkib.
Prezident İlham Əliyev dəfələrlə minatəmizləmə prosesinin prioritet olduğunu vurğulayıb və bəyan edib ki, azad edilmiş torpaqlarda minatəmizləmə işləri birinci dərəcəli vəzifədir”.
O, bildirib ki, minalardan təmizləmə prosesi həm vaxt, həm də böyük maliyyə resursları tələb edir: “Bu səbəbdən beynəlxalq tərəfdaşların bu prosesə daha geniş şəkildə qoşulması vacibdir. Yeri gəlmişkən, Azərbaycan hazırda ABŞ ilə müasir texnologiyalar sahəsində əməkdaşlığa maraq göstərir. Şübhəsiz, müasir texnologiyalar minatəmizləmə prosesini sürətləndirmək baxımından vacibdir. Bu xüsusda ABŞ ilə texnoloji əməkdaşlıq yeni imkanlar aça bilər. Mina sahələrinin dəqiq xəritələndirilməsi, məsafədən aşkarlama, pilotsuz texnologiyalar və digər innovativ həllər böyük ərazilərin daha sürətli və təhlükəsiz şəkildə yoxlanılması baxımından vacibdir. Əslində cari ilin yanvarında ABŞ-nin Azərbaycandakı səfirliyinin müvəqqəti işlər vəkili ilə görüş zamanı ölkəmizin üzləşdiyi mina problemi və bu problemin aradan qaldırılması istiqamətində icra edilən humanitar minatəmizləmə fəaliyyətinin gedişatı barədə qonağa geniş təqdimat edilib.
Görüşdə, humanitar minatəmizləmə sahəsində gələcək əməkdaşlıq perspektivləri və ABŞ tərəfindən dəstək imkanları ətrafında fikir mübadiləsi aparılıb.
Azərbaycanın bu istiqamətdə öz texnoloji imkanlarını inkişaf etdirməsini də xüsusi qeyd etməliyik. Müxtəlif ölkələrlə əməkdaşlıq çərçivəsində qabaqcıl avadanlıq və texnologiyalar öyrənilməkdədir. 2026-cı ilin martında nümayəndə heyəti Çində mexaniki minatəmizləmə maşınları, mina aşkarlayan dronlar və partlayıcı sursatların zərərsizləşdirilməsi üçün robotlar da daxil olmaqla müxtəlif texnoloji həllərlə tanış olub”.
O, bildirib ki, Avropa İttifaqı da Azərbaycanın humanitar minatəmizləmə səylərinə dəstəyini açıqlayıb: “Belə ki, cari ilin iyulunda ölkəmizə səfər edən Avropa Komissiyasının Prezidenti Ursula Fon der Lyayen Prezident İlham Əliyevlə görüşdən sonra mətbuata bəyanat zamanı bildirib ki, Aİ-nin 20 milyon avro dəyərində olan sülhün inkişafı proqramının əsas istiqamətlərindən biri də minatəmizləmə vasitəsilə təhlükəsizliyə diqqətdir. Bundan əvvəl də xanım Lyayen Azərbaycanın Aİ üçün mühüm tərəfdaş olduğunu vurğulayaraq İttifaqın ölkədə minatəmizləmə sahəsində aparıcı donor olduğunu və bu məqsədlə 4,25 milyon avroluq yeni paket elan edildiyini bildirmişdi. O, Aİ-nin bu sahədə Azərbaycana texnika və mütəxəssis bacarıqları ilə də dəstək verməyə hazır olduğunu qeyd etmişdi.
Yəni, hesab edirəm ki, Azərbaycanın geniş əməliyyat təcrübəsi və milli potensialı, ABŞ-nin texnoloji imkanları, Avropa İttifaqının maliyyə və institusional dəstəyi birlikdə minatəmizləmə prosesinin daha səmərəli aparılması üçün yeni imkanlar yarada bilər”.
19:16 14.08.2026
Oxunuş sayı: 50
