Ermənistanla münasibətlərdə yeni mərhələ: Konkret layihələr siyasi etimad formalaşdıracaq
Azərbaycan və Ermənistan arasında enerji sahəsində mümkün əməkdaşlıqla bağlı yeni açıqlama verilib. Ermənistanın Baş naziri Nikol Paşinyan azərbaycanlı mütəxəssislərin 2025-ci ilin sentyabrında və 2026-cı ilin yanvarında Ermənistana iki dəfə səfər etdiyini bildirib. Görüşlərdə elektrik verilişi xətləri ilə yanaşı, dəmir yolu, boru kəmərləri və digər infrastruktur məsələləri müzakirə olunub. Paşinyan iki ölkə arasında elektrik enerjisinin qarşılıqlı ixracı və idxalının da mümkün olduğunu açıqlayıb.
Milli Məclisin deputatı Ülviyyə Həmzəyeva Crossmedia.az-a açıqlamasında Azərbaycan və Ermənistan arasında enerji əməkdaşlığının siyasi etimadın formalaşmasına və regionda sülhün möhkəmlənməsinə mümkün təsirlərindən danışıb. O, qarşılıqlı iqtisadi maraqlara əsaslanan layihələrin iki ölkə arasında əməkdaşlığın inkişafına töhfə verə biləcəyini bildirib: “Enerji əməkdaşlığı Azərbaycan və Ermənistan arasında siyasi etimadın formalaşmasına ciddi töhfə verə bilər. Uzun illər münaqişə şəraitində yaşamış iki ölkə üçün sülhün yalnız siyasi bəyanatlarla deyil, qarşılıqlı iqtisadi maraqlar və konkret əməkdaşlıq layihələri ilə möhkəmləndirilməsi vacibdir".
Deputat Azərbaycanın enerji sahəsində həyata keçirdiyi siyasətin ölkənin regionda mühüm enerji istehsalçısı və etibarlı tərəfdaşa çevrilməsinə imkan verdiyini qeyd edib:
"Azərbaycan Prezident İlham Əliyevin uzun illər ərzində həyata keçirdiyi ardıcıl enerji siyasəti nəticəsində regionun mühüm enerji istehsalçısı və ixracatçısına, eyni zamanda etibarlı enerji tərəfdaşına çevrilib. Bu potensialın gələcəkdə Ermənistanla qarşılıqlı faydalı əməkdaşlığa yönəldilməsi həm iqtisadi, həm də siyasi baxımdan əhəmiyyətli ola bilər. Enerji şəbəkələrinin əlaqələndirilməsi və qarşılıqlı enerji ticarəti tərəflər arasında uzunmüddətli iqtisadi maraqlar formalaşdırar. Bu isə sabitliyin və sülhün qorunmasını hər iki tərəf üçün daha dəyərli edir".
Ü.Həmzəyeva qeyd edib ki, regionda sülh və əməkdaşlığın möhkəmləndirilməsi üçün enerji ilə yanaşı, nəqliyyat və kommunikasiya əlaqələrinin bərpası da mühüm əhəmiyyət daşıyır:
"Ən önəmlisi, Prezident İlham Əliyevin müharibədən sonra irəli sürdüyü siyasət yalnız sülh sazişinin imzalanmasını deyil, bütövlükdə Cənubi Qafqazda yeni əməkdaşlıq mühitinin yaradılmasını nəzərdə tutur. Enerji, nəqliyyat və kommunikasiyaların açılması bu yanaşmanın praktik əsasını təşkil edə bilər. Paşinyanın son açıqlamaları da Ermənistan tərəfinin belə əməkdaşlığın mümkün faydalarını getdikcə daha aydın gördüyünü göstərir".
Deputatın sözlərinə görə, konkret iqtisadi layihələrin reallaşdırılması siyasi etimadın da tədricən möhkəmlənməsinə şərait yarada bilər:
"Qarşılıqlı maraqlara söykənən konkret layihələr həyata keçdikcə siyasi etimad da tədricən möhkəmlənəcək. Beləliklə, Prezident İlham Əliyevin irəli sürdüyü regional sülh və əməkdaşlıq modeli real iqtisadi məzmun qazanaraq Cənubi Qafqazda uzunmüddətli sabitliyin əsaslarından birinə çevrilə bilər".
Nigar Xəlilli
16:00 14.08.2026
Oxunuş sayı: 43
