FT: Kreml bu il orduya 409 min yeni rusiyalı cəlb etməyi planlaşdırır
Rusiyada yeni səfərbərlik dalğası elan edilməsə də, orduya müqavilə əsasında hərbçi cəlb edilməsi ilə bağlı təzyiqlərin artdığı bildirilir. Hesabatda Rusiyanın müxtəlif bölgələrinə əlavə 409 min nəfərin orduya göndərilməsi üzrə plan verildiyi iddia olunur. Bu prosesin Ukraynada davam edən müharibə fonunda Rusiya ordusunun şəxsi heyət ehtiyacını qarşılamaq məqsədi daşıdığı qeyd edilir.
Crossmedia.az xəbər verir ki, “Financial Times”ın yazdığına görə, Rusiya Müdafiə Nazirliyi yeni səfərbərlikdən yayınmaq üçün vətəndaşların müqavilə əsasında hərbi xidmətə cəlb edilməsinə daha çox təzyiq göstərir.
Nəşrin məlumatına görə, işə cəlbetmə prosesində küçə reydləri, insan oğurluğu və tələbələrin aldadılması kimi sərt üsullardan istifadə edildiyi iddia olunur. Qəzet həmçinin Rusiya qüvvələrinin müxtəlif istiqamətlərdə bölündüyünü və böyük itkilər fonunda yalnız məhdud irəliləyiş əldə etdiyini yazır.
Qərb hökumətlərinin qiymətləndirmələrinə görə, müharibə başlayandan bəri təxminən 500 min Rusiya hərbçisi həlak olub. “Financial Times” qeyd edir ki, Rusiya yeni hərbçi cəlbetmə tempini artıra və ya səfərbərlik keçirə bilməsə, ordunun bölmələri tükənməkdə davam edə və hücum əməliyyatları zəifləyə bilər.
17:24 05.09.2026
Oxunuş sayı: 50
