Azərbaycan dövlətinin təyyarə qəzasına operativ reaksiyası: Dövlət və Xalqın Birliyi
Azərbaycan tarixində baş vermiş ən kədərli hadisələrdən biri 25 dekabrda baş verən təyyarə qəzası oldu. Ümumilikdə göyərtəsində 67 nəfərin olduğu, qəza nəticəsində 36 nəfər sərnişin və ekipaj üzvünün həyatını itirməsi qəzanın böyüklüyünü və faciəsini bir daha xatırladır. Azərbaycanda bundan əvvəl də iki dəfə təyyarə qəzaları baş vermiş, bu hadisələrdə də ölüm və yaralanma halları qeydə alınmışdı. Lakin bu kimi hadisələr dövlət və xalqımızın birgə həmrəyliyinin və çətin məqamlarda bir araya gələ bilmək bacarığının parlaq nümunəsinə çevrilmişdir.
Cənab Prezident İlham Əliyevin hadisəyə operativ reaksiya verməsi, səfərini dərhal təxirə salaraq ölkəyə qayıtması, hadisənin ilkin anlarından etibarən müvafiq göstərişlər verməsi bir daha sübut etdi ki, liderlik təkcə idarəetmə bacarığı deyil, eyni zamanda xalqın yanında olmaq mənasını daşıyır.
Prezidentin təşəbbüsü ilə hadisənin hərtərəfli araşdırılması məqsədilə dərhal dövlət komissiyası yaradıldı. Azərbaycanın yüksək vəzifəli şəxslərindən ibarət komanda qəzanın səbəblərinin müəyyən edilməsi üçün ciddi işlərə başladı. Azərbaycan, Qazaxıstan və Braziliyadan dəvət olunan ekspertlərdən ibarət beynəlxalq komanda hadisəni araşdırmaq üçün operativ fəaliyyətə başladı. Eyni zamanda, aidiyyəti nazirliklərin rəhbərlərinin hadisə yerinə səfər etməsi, baş verənlərə operativ müdaxilə olunması və dəstək tədbirlərinin həyata keçirilməsi dövlətin və onun təmsilçilərinin vahid, peşəkar fəaliyyətini bir daha nümayiş etdirdi.
MEDİA Agentliyinin və peşəkar media qurumlarının hadisə ilə bağlı operativ və düzgün məlumat yayması da ictimaiyyətin vaxtında məlumatlandırılması baxımından mühüm əhəmiyyət kəsb etdi. Media qurumları bu prosesdə yalnız informasiya yayıcısı deyil, həm də milli həmrəyliyin təbliğatçısı kimi çıxış etdilər.
Hadisə ilə bağlı milli matəm elan olunması dövlət və xalqın birlikdə hərəkət etməsinin təzahürü idi. Hətta qeyd etmək lazımdır ki, qəza baş verdiyi andan xalqımız matəmə bürünmüşdü. Siyasi partiyalar, fərqli mövqelərə malik qurumlar bu hadisədə dövlət və xalqın yanında olduqlarını bəyan etdilər, siyasi müxalifətçilik deyil, milli birlik və dövlətçilik mövqeyindən çıxış etməyi üstün tutdular. Bu isə ölkənin vahid milli maraqlar ətrafında necə birləşdiyini bir daha nümayiş etdirdi.
Hadisə beynəlxalq miqyasda da geniş rezonans doğurdu. Türkiyə, Pakistan, İran, ABŞ Azərbaycan xalqına başsağlığı verdi. Xüsusilə, qardaş Qazaxıstan hökumətinin və xalqının dəstəyi diqqətəlayiq idi. Qazaxıstan rəhbərliyi həm mənəvi, həm də praktiki yardımlarla Azərbaycanın yanında olduğunu bəyan etdi. Qazax xalqının başlatdığı qanvermə aksiyası humanizm və dostluq dəyərlərinin əyani sübutu oldu. Bu hadisə bir daha Türk xalqlarının birliyinin nə qədər möhkəm olduğunu göstərdi.
Hadisə göstərdi ki, Azərbaycan dövləti və xalqı çətin anlarda bir araya gələrək həm milli, həm də beynəlxalq səviyyədə güclü həmrəylik nümayiş etdirmək bacarığına malikdir. Prezident İlham Əliyev başda olmaqla, dövlət qurumlarının peşəkarlığı, media vasitələrinin düzgün yanaşması, xalqın milli birlik hissi və beynəlxalq dostluq münasibətləri Azərbaycanın gücünü və böhranlı vəziyyətlərdə birliyini bir daha təsdiq etdi.
Ayhan Ağarzayev
12:24 27.12.2024
Oxunuş sayı: 11388
