AÇG-də gizli neft ehtiyatlarına doğru: yeni quyu qazılır
Bu ilin may ayında Xəzər dənizinin Azərbaycan sektorunda yerləşən "Azəri-Çıraq-Günəşli" (AÇG) yataqlar blokunda ilk neft halqası quyusunun qazılması prosesinə başlanılıb.
Crossmedia.az xəbər verir ki, bu məlumat blokun operatoru olan "BP-Azerbaijan" şirkətinin əməliyyatçılar adından cari ilin birinci yarısının nəticələrinə dair yayımladığı biznes hesabatında əks olunub.
Hesabata görə, sərbəst təbii qaz (STQ) istehsalından əlavə olaraq, ilk hasilat quyusu Qırmakıaltı Qumlu lay dəstinin dibində, qaz və su layları arasında mövcud olan neft halqasını da müəyyən edib: "Birinci neft halqası quyusu "Dərinsulu Günəşli" platformasından qazılmaq məqsədilə nəzərdə tutulmuş və qazma prosesi may ayında start götürüb. Bu quyuda qazma əməliyyatlarının 2026-cı ilin ikinci yarısında tamamlanacağı proqnozlaşdırılır".
Bildirilir ki, ilin birinci yarısında AÇG-də STQ hasilatı əməliyyatlarının işə düşməsi ilə yataq ilk kommersiya qaz istehsalı əməliyyatları mərhələsinə daxil olub.
AÇG-də ilk STQ hasilat əməliyyatları 2025-ci ildə qazılmış və hazırda istismar edilən neft laylarının altında yerləşən iki prioritet STQ layını – nisbətən dayaz Qırmakıüstü Qumlu və daha dərin Qırmakıaltı Qumlu lay dəstlərini hədəf alan ilk hasilat quyusunda başladılıb. Quyu Qırmakıüstü Qumlu lay dəstində qaz ehtiyatlarının olmasını təsdiq etmiş, Qırmakıaltı Qumlu lay dəstində isə yüksək təzyiqli qaz ehtiyatlarının mövcudluğunu aşkara çıxarmışdı.
Birinci STQ hasilat əməliyyatları Qırmakıaltı Qumlu lay dəstində başladılıb və ilkin mərhələ istehsalı ilə yanaşı, quyuda və lay dəstində sınaq proseslərinin həyata keçirilməsini də özündə ehtiva edir.
Quyudan çıxarılan qaz və kondensat, neft və qaz emalı sistemlərinin inteqrasiyası vasitəsilə mövcud AÇG infrastrukturundan yararlanmaqla Səngəçal terminalına yönləndirilir ki, bu da mövcud dəniz qurğularından effektiv istifadəyə şərait yaradır.
İlk neft halqası quyusundan eyni zamanda əlavə qiymətləndirmə məlumatlarının toplanması da nəzərdə tutulur ki, bu da AÇG ərazisində gələcək işlənmə perspektivlərinin dəyərləndirilməsinə kömək edəcək.
Qeyd edək ki, AÇG yataqlar blokunun birgə işlənməsi və hasil olunan neftin pay şəklində bölüşdürülməsinə dair saziş (PSA) 1994-cü il sentyabrın 20-də imzalanıb. 1995-ci ilin fevralında ABƏŞ təsis edilib.
2017-ci il sentyabrın 14-də isə həmin yataqların birgə istismarı və hasilatın pay bölgüsünə dair yenilənmiş saziş imzalanıb. Bu müqavilə yataqların 2049-cu ilin sonunadək işlənməsini nəzərdə tutur.
AÇG-də pay sahibləri bunlardır: BP (30,37 %), SOCAR (35,3 %), MOL (9,57 %) INPEX (9,31 %), "ExxonMobil" (6,79 %), TPAO (5,73 %), "ONGC Videsh Limited" (OVL) (2,92 %).
13:43 06.08.2026
Oxunuş sayı: 74
