Azərbaycanda hökm sürən sabitlik və təhlükəsizlik müasir inkişafın əsas dayağıdır
2024-cü ilin idman yekunlarına həsr olunmuş mərasimdə Prezident İlham Əliyev Azərbaycanın sabitlik və inkişaf yolunda əldə etdiyi nailiyyətləri ətraflı şəkildə şərh edib. Dövlət başçısı qeyd edib ki, müasir dövrdə dünya ciddi sınaqlarla üz-üzədir. Beynəlxalq səviyyədə qanlı münaqişələrin, hərbi toqquşmaların və siyasi gərginliklərin artdığı bir şəraitdə Azərbaycan xalq-iqtidar birliyinə söykənərək əmin-amanlıq şəraitində yaşayır. O, Azərbaycanın bu sabitliyi qoruyub saxlamasının həm milli birliyə, həm də ölkənin həyata keçirdiyi müdrik siyasətə bağlı olduğunu vurğulayıb. Prezident əlavə edib ki, Azərbaycanın idman sahəsində qazandığı uğurlar təkcə milli qürur mənbəyi olmaqla qalmayıb, həm də ölkənin beynəlxalq nüfuzunu daha da gücləndirib.
Milli Məclisin deputatı Tənzilə Rüstəmxanlı Prezident İlham Əliyevin çıxışına münasibət bildirərək, Azərbaycan rəhbərinin dediklərini yüksək qiymətləndirib. Deputat Crossmedia.az-a verdiyi açıqlamasında qeyd edib ki, hazırda dünya siyasi, iqtisadi və hərbi böhranlarla qarşılaşır. Şərqi Avropada Rusiya-Ukrayna müharibəsi, Yaxın Şərqdə İsrail-Həmas münaqişəsi, Suriyadakı qarşıdurmalar və digər bölgələrdə baş verən hadisələr geniş miqyaslı narahatlıq yaradır. Bundan başqa, Qərb dövlətlərinin, xüsusilə ABŞ-ın apardığı yeni müstəmləkə siyasəti dünya miqyasında humanitar fəlakətlərə səbəb olur. Belə bir mürəkkəb dövrdə Azərbaycanın sabitlik adası kimi tanınması həm daxili siyasətin gücünü, həm də xalqla dövlət arasındakı sarsılmaz birliyi təsdiqləyir.
Tənzilə Rüstəmxanlı bildirib ki, Azərbaycanda hökm sürən sabitlik və təhlükəsizlik müasir inkişafın əsas dayağıdır. Xüsusilə Prezident İlham Əliyevin rəhbərliyi dövründə ölkənin ərazi bütövlüyünün bərpası və davamlı uğurlar qazanmaları xarici düşmən qüvvələrin təxribatlarını iflasa uğradıb. Deputat deyib: “Ölkəmiz nəinki sabitliyini qoruyub saxlayır, eyni zamanda, inkişaf yolunda inamla irəliləyir. Azərbaycanın qarşısını almaq üçün ortaya atılan xəbis niyyətlər hər zaman uğursuzluğa düçar olur.”
Deputat Azərbaycanın beynəlxalq səviyyədə müharibə qanunlarına riayət edərək hərəkət etdiyini, mülki əhalini və infrastrukturu qorumaq prinsiplərinə əməl etdiyini xüsusi vurğulayıb. Qarabağ münaqişəsi ilə bağlı diplomatik həll yollarının tükəndiyi bir şəraitdə Azərbaycan öz torpaqlarını hərbi yolla azad etməyə məcbur olub. Bu zaman Azərbaycan beynəlxalq hüquqa uyğun şəkildə hərəkət edərək həm öz haqqını təmin edib, həm də bütün dünyaya ədalətli müharibənin necə aparılmalı olduğuna dair nümunə göstərib.
Tənzilə Rüstəmxanlı Prezident İlham Əliyevin liderlik keyfiyyətlərini yüksək qiymətləndirib və onun qlobal miqyasda ehtiyac duyulan bir siyasətçi olduğunu qeyd edib. Deputat əlavə edib: “Prezident İlham Əliyevin balanslaşdırılmış, çoxşaxəli və çevik siyasəti nəticəsində Azərbaycan nəinki ərazi bütövlüyünü bərpa etdi, həm də öz suverenliyini qoruyaraq gücləndirdi. Bu siyasət dünya liderləri üçün bir nümunədir.”
Eyni zamanda, deputat Azərbaycanın beynəlxalq tədbirlərə ev sahibliyi etməsinin xüsusi əhəmiyyətini vurğulayıb. Vaxtilə Azərbaycanın həqiqətlərini dünyaya çatdırmaq üçün xaricə səfərlər təşkil etməyin zəruri olduğunu xatırladan deputat bildirib ki, bu gün Azərbaycan artıq qlobal tədbirlərin keçirildiyi ideal məkana çevrilib. Bu tədbirlər ölkənin beynəlxalq imicini daha da gücləndirir, yeni əməkdaşlıq formatlarının yaranmasına şərait yaradır və Azərbaycanın həqiqətlərinin dünya ictimaiyyətinə çatdırılmasında mühüm rol oynayır.
Deputat qeyd edib ki, Azərbaycanın dostlarının sayı hər ötən gün artır. Beynəlxalq tədbirlər zamanı ölkəmiz həm mövcud əlaqələri möhkəmləndirir, həm də yeni tərəfdaşlıqların təməlinə imza atır. Azərbaycanın təşəbbüsü ilə keçirilən tədbirlər regional və qlobal çağırışlara cavab verərək dünya miqyasında həmrəylik nümayiş etdirir. “Bu, Azərbaycanın qarşılıqlı etimad və əməkdaşlıq mühitinin qorunmasına verdiyi önəmin parlaq nümunəsidir,” – deyə deputat əlavə edib.
Nəticədə, deputat əminliklə vurğulayıb ki, Prezident İlham Əliyevin liderliyi altında Azərbaycan həm regionda, həm də dünyada sabitlik və inkişaf nümunəsi olmağa davam edəcək.
Nihat Tahirov
14:48 24.12.2024
Oxunuş sayı: 8917
