Rafiq Hüseynov: Yeniyetmə güləşçilərimiz U17 Dünya Çempionatına hazırdır
Azərbaycanın yeniyetmə güləşçiləri iyulun 27-dən avqustun 2-dək Bakıda təşkil olunacaq Güləş üzrə U-17 dünya çempionatına hazırdır.
Crossmedia.az xəbər verir ki, bu barədə Azərbaycanın Yunan-Roma güləşi üzrə yeniyetmə yığma komandasının baş məşqçisi Rafiq Hüseynov bildirib.
Onun sözlərinə görə, hazırda komanda Bakıda təlim-məşq toplanışını sürdürür:
"Ölkə birinciliyinin ardından müxtəlif məkanlarda təlim-məşq toplanışları təşkil etdik. Hazırlıq prosesinə Şamaxıdan start verdik. Sonra Özbəkistanın Buxara şəhərində toplanış keçirdik. Həmin toplanış zamanı Türkiyədə baş tutan "Zəfər kuboku" turniri üçün seçim prosesimizi həyata keçirdik. Bu yarışda uğurlu çıxış edən idmançılarımız Avropa çempionatı heyətinə daxil edildi. Qitə birinciliyindən sonra artıq 3-cü təlim-məşq toplanışımızı həyata keçiririk. Sonuncu hazırlıq mərhələsi komandanın tam formaya düşməsinə yönəlib. Yığmamız optimal hazırlıq səviyyəsinə çatıb. Kiçik zədələr ciddi narahatlıq doğurmur. Dünya çempionatınadək cəmi 10 təlim-məşq toplanışı keçirmiş olacağıq. Bütün bu hazırlıq prosesləri Azərbaycan Güləş Federasiyası tərəfindən ən yüksək standartlarda təşkil olunub və bizə hər cür dəstək göstərilib".
19:15 15.07.2026
Oxunuş sayı: 50
