Gənclər və İdman

Qrup mərhələsinə yüksəlməsi gözlənilən klublar açıqlandı

Avrokubokların I təsnifat mərhələsinin ilk oyunları Azərbaycan futbolu üçün uğurlu başlanğıcla yadda qaldı. “Qarabağ”, “Zirə” və “Sabah”ın qələbələri təkcə cari mövsüm baxımından deyil, həm də statistika baxımından diqqət çəkir. Belə ki, Azərbaycan klublarının Avrokuboklarda eyni həftədə keçirdiyi hər üç oyundan qalib ayrılması tarixdə cəmi ikinci dəfə baş verib. Bu nəticələr son illərdə klub futbolunda aparılan işlərin bəhrəsi kimi qiymətləndirilir və Azərbaycan futbolunun inkişaf dinamikası ilə bağlı müzakirələri yenidən gündəmə gətirir.

Mövzu ilə bağlı veteran futbolcu Aslan Kərimov Crossmedia.az-a açıqlamasında qeyd edib ki, klublararası Dünya Çempionatı daxili çempionatımızı və klublarımızın oyunlarını diqqətlə izləməyə çox da imkan vermir: “Amma hər halda nəticələr göz önündədir. Düşünürəm ki, klub səviyyəsində artım müşahidə olunur. Artıq “Qarabağ” əvvəlki kimi mütləq hegemonluğunu göstərə bilmir. Ona rəqabət apara biləcək klublarımız formalaşıb. Elə bunun nəticəsidir ki, Avrokuboklarda ilk mərhələdə qarşılaşdığımız rəqibləri geridə qoymağı bacarmışıq. Düzdür, hələlik söhbət ilk oyunlardan gedir, amma ən azından komandalarımız qələbə qazanıblar. Növbəti mərhələdə isə, çox şey rəqiblərdən asılı olacaq. Əslində, Avrokuboklar başlamazdan əvvəl də qeyd etmişdim ki, dörd komandamızın hamısı ilk mərhələni keçmək iqtidarındadır. Çünki həm reytinq, həm də klub səviyyəsi baxımından ilk mərhələdə qarşılaşa biləcəyimiz rəqiblərin hər birini məğlub etmək gücündə idik. Komandalarımız da bunun öhdəsindən gəldilər”.

Futbolçu əlavə edib ki, bu, hələ başlanğıcdır: “Hesab edirəm ki, bu il ən azı iki klubumuz qrup mərhələsinə yüksələ bilər. Hansı turnir olmasının fərqi yoxdur — Çempionlar Liqası, Avropa Liqası və ya Konfrans Liqası. Düşünürəm ki, iki komandamızın qrup mərhələsinə yüksəlmək potensialı var. Ən azından bunu görmək istərdik. Vaxtilə “Qarabağ” və “Qəbələ”, eləcə də “Neftçi” və “Qarabağ” bunu bacarmışdılar. İndi isə düşünürəm ki, “Sabah” və “Qarabağ” da bunun öhdəsindən gələ bilərlər. Yəni buna kifayət qədər yaxındırlar. Ümumilikdə isə bu barədə yalnız müsbət fikirlər söyləyə bilərəm. Hesab edirəm ki, klub səviyyəsində komandalarımız həqiqətən də ciddi irəliləyişə nail olublar”.

Ayhan

🖨 Çap et

14:00 11.07.2026

Oxunuş sayı: 75