Azərbaycan ordusu döyüş hazırlığını artırır: Zəruri tədbirlər görülür
Azərbaycan Ordusunda döyüş hazırlığının artırılması istiqamətində növbəti mühüm mərhələ icra olunur. Belə ki, Quru Qoşunlarının iştirakı ilə keçirilən irimiqyaslı əməliyyat təlimlərində şəxsi heyətin hazırlıq səviyyəsi, müasir silah və texnikanın tətbiqi, eləcə də müxtəlif döyüş ssenariləri sınaqdan keçirilir. Təlimlər həm ordunun operativ imkanlarının qiymətləndirilməsi, həm də müasir müharibə şəraitinə uyğun fəaliyyət vərdişlərinin təkmilləşdirilməsi baxımından xüsusi əhəmiyyət daşıyır.
Keçirilən təlimlərlə bağlı Crossmedia.az-a açıqlama verən hərbi ekspert Üzeyir Cəfərov bildirib ki, bu, Quru Qoşunlarında keçirilən əməliyyat təlimidir və hər il Müdafiə Nazirliyinin təsdiq etdiyi hazırlıq planına uyğun olaraq təşkil olunur:
"Quru Qoşunları bir neçə il bundan əvvəl ayrıca bir qurum kimi formalaşdırılıb. Quru Qoşunlarının rəhbərliyi altında komando, motoatıcı, mexanikləşdirilmiş və artilleriya hərbi hissələri fəaliyyət göstərir. Həmçinin bu hərbi hissələrin təminatını və şəxsi heyətin fəaliyyətini təmin edən digər bölmələr də mövcuddur. Təlimlərə səfərbərliyə cəlb olunan şəxslər də qatılır. Bu təlimlərin məqsədi hərbi hissələrin daim döyüşə hazır vəziyyətdə saxlanılmasıdır. Şəxsi heyətin lazım olan nöqtələrə həm hava, həm də avtomobil yolları ilə çıxarılması, süni maneələrin yaradılması şəraitində döyüş təminatı rayonlarına irəliləməsi və əməliyyat tapşırıqlarını yerinə yetirməsi məşq olunur. Bütün bunlar təlimlər zamanı yoxlanılır. Yekun mərhələdə isə müdafiə nazirinin rəhbərliyi ilə təlimlər izlənilir və qiymətləndirilir. Əsas məqsəd qoşunların döyüş hazırlığını ən yüksək səviyyədə saxlamaqdır. Azərbaycan müharibədən çıxmış ölkə olduğundan bu təlimlər regionda baş verən hadisələr fonunda hazırlıq xarakteri daşıyır".
Ekspert əlavə edib ki, təlimlərdə pilotsuz uçuş aparatları, radioelektron mübarizə və radiotexniki kəşfiyyat vasitələri, yeni alınmış silah-sursatlar və rabitə avadanlıqları yoxlanılır və sınaqdan keçirilir:
"Zərurət yarandıqda Hava Hücumundan Müdafiə Qoşunları və Hərbi Hava Qüvvələri də verilən tapşırıqların yerinə yetirilməsinə cəlb olunur. Müxtəlif ssenarilər üzrə fəaliyyətlər icra edilir. Təlimlər həm düzənlik, həm də dağlıq və meşəlik ərazilərdə, yaşayış məntəqələrindən kənarda keçirilir. Bu irimiqyaslı əməliyyat təlimləri ordunun döyüş qabiliyyətini yüksək səviyyədə saxlamaq məqsədi daşıyır. Təlimlərə Quru Qoşunlarına aid bütün hərbi hissələr və birləşmələr, o cümlədən ehtiyatdan çağırılan şəxsi heyət cəlb olunur. Bu irimiqyaslı əməliyyat təlimlərinin əsas məqsədi ordunun Quru Qoşunlarının döyüş hazırlığını daim yüksək səviyyədə saxlamaqdır. Quru Qoşunları ilə yanaşı, Hərbi Dəniz Qüvvələri, Hərbi Hava Qüvvələri, Azərbaycanın işğaldan azad olunmuş ərazilərində, eləcə də Naxçıvan Əlahiddə Ümumqoşun Ordusunda yerləşən bölmələr də bu prosesin tərkib hissəsidir. Azərbaycan Ordusunun döyüş hazırlığının artırılması üçün zəruri tədbirlər bu təlimlər çərçivəsində həyata keçirilir".
Fatimə Məmmədova
19:30 09.07.2026
Oxunuş sayı: 68
